«Այս Հարկային օրենսգիրքը մշակվել է Հովիկ Աբրահամյանի կառավարության ժամանակ և հիմնականում այն ունեցել է կարճաժամկետ ֆիսկալ ուղղվածություն, այսինքն՝ ամեն գնով բյուջեն լցնել՝ առանց երկարաժամկետ խնդիրների մասին մտածելու, հետո այն ընդունվեց Կարեն Կարապետյանի կաբինետի կողմից։
Ինչ վերաբերում է եկամտային հարկը իջեցնելուն, ապա այո, նախորդ կառավարությունն առարկում էր, թե 46 միլիարդ դրամի ճեղքվածք է ունենալու բյուջեն, եթե եկամտային հարկի դրույքաչափերը նվազեցվեն, բայց չպետք է մոռանանք, որ բարձրացված եկամտային հարկի պայմաններում բիզնեսն ավելի շատ հակված էր ստվերում աշխատելու, ցածր շահութահարկ վճարելու և արդյունքում, ըստ էության, հարկային բազան էր նեղացվելու։
Ներկայիս կառավարության մոտեցումն ենթադրում է, որ հնարավորություն է տրվում նախ ստվերից հանել աշխատավարձերը և եթե բյուջետային կորուստներ են լինելու, ապա դրանք կոմպենսացնել այլ հարկատեսակների հաշվին»,- «Առաջին լրատվական»-ի հետ զրույցում նշեց ՀՊՏՀ «Ինովացիոն և ինստիտուցիոնալ հետազոտությունների կենտրոն»-ի ղեկավար, տնտեսագետ Ատոմ Մարգարյանը՝ անդրադառնալով եկամտային հարկի դրույքաչափերի նվազեցման վերաբերյալ կառավարության անդամների հայտարարություններին և այն հարցին, թե ի՞նչ միջոցների հաշվին է կառավարությունը գնալու այդ քայլին։
«Մենք այս մի քանի ամիսների ընթացքում արդեն տեսնում ենք, որ այդպիսի հնարավորություններ կան և ավելի քան մեծ հնարավորություններ են դրանք․ ստվերում հարկային մեծ գումարներ կան և ամենահամեստ գնահատականով դա 20-ից 22%-ի սահմաններում է և, ըստ էության, սա երևակելը ժամանակի խնդիր է, բայց մյուս կողմից, եթե մենք բիզնեսին ստիպում ենք այլևայլ մեխանիզմներով՝ ԱԱԾ-ով, ոստիկանությունով, դատախազությունով և այլն, ամբողջությամբ դուրս գալ ստվերից, ապա մենք լրացուցիչ գնային ճնշումներ ենք առաջացնում տնտեսության մեջ, բացի դրանից սրա արդյունքում շատ բիզնեսներ կարող են փակվել, հետևաբար հարկային օրենսդրության մեջ պետք է փոփոխություններ անել, այսինքն՝ ստվերը բացահայտելուն զուգահեռ պետք է մտածել ընդհանուր հարկային բեռը նվազեցնելու մասին»,-հավելեց Ատոմ Մարգարյանը։
Մանրամասները՝ տեսանյութում։
