Ռուսաստանի նախագահ Վլադիմիր Պուտինը ԿԺԴՀ առաջնորդ Կիմ Չեն Ընին ուղարկված պատասխան հեռագրում հայտարարել է, որ պատրաստ է հանդիպել նրա հետ մոտ ժամանակներս։
«Ես հաստատում եմ իմ պատրաստակամությունը մոտ ժամանակներս հանդիպելու Ձեզ հետ, որպեսզի քննարկենք երկկողմանի հարաբերությունների անհետաձգելի հարցերն ու տարածաշրջանային հարցերը»,– ասվում է հեռագրում։
Պուտինը նաև շնորհավորել է Կիմ Չեն Ընին և հյուսիսկորեացիներին «համազգային տոնի կապակցությամբ» և բարձր է գնահատել այն, որ հյուսիսկորեական առաջնորդը հիշում է այն մասին, թե ինչպես են Կարմիր բանակի զինվորներն ու կորեացիները «կռվել ուս ուսի տված» ընդհանուր թշնամու դեմ։
Ավելի վաղ Կիմ Չեն Ընը Ռուսաստանի նախագահ Վլադիմիր Պուտինին շնորհավորական հեռագիր էր ուղարկել՝ ճապոնական տիրապետությունից Կորեայի ազատագրման 73-րդ տարեդարձի կապակցությամբ։
