Հակառակորդի կողմից ակտիվություն նկատվել է մայիս ամսվա ընթացքում մինչև հունիսի 5-ը, երբ գրեթե ամեն օր զրահատեխնիկայի, անձնակազմի շարժեր ու կուտակումներ կար։ Հունիսի 5-ից հետո ակտիվությունը նվազել է, դա հնարավոր է կապված լինի եղանկային պայմանների հետ։ Այս մասին Արցախում առաջնագծում «Առաջին լրատվական»-ի հետ զրույցում ասաց N զորամասի հրամանատար, գնդապետ Գեղամ Գաբրիելյանը։
Հրամանատարի խոսքով՝ ապրիլյան պատերազմը ցույց տվեց, որ մենք 20 տարի նախապատրաստվում էինք պատերազմի ու ճիշտ էինք գուշակում, որ պատերազմ լինելու է։ Հակառակորդը ցույց տվեց, որ երբ իրեն ուժեղ զգա, պատերազմ սկսելու է, ոչ ոքի չի լսելու։
«Խաղաղ ժամանակ պետք է պատրաստվել պատերազմի, դա բոլորը զգացին։ Ապրիլյան պատերազմից հետո փոփոխություններ եղել են։ Կոնկրետ մեր պաշտպանական շրջանում մինչև ապրիլյան դեպքերը ցերեկային և գիշերային տեսադիտարկման և հսկման սարքեր չեն եղել, միայն եղել է զենքի վրա։ Իսկ հիմա բոլոր դիրքերում ունենք այդ սարքերը ու ցերեկ թե գիշեր կարողանում ենք նայել հակառկորդին, վերահսկել իկրավիճակը և եթե անհրաժեշտ է համարժեք պատասխան տալ։ Դա ևս մեկ անգամ հաստատվեց 2017 թվականի փետրվարի 24-ի գիշերը, երբ հակառակորդը դիւվերսիոն ներթափանցման փորձ ձեռնարկեց, մեր զինվորները տեսան, խոցեցին և հակառակորդը, թողնելով դիակները, հետ փախավ։ Ահագին մեծ ինժեներական աշխատանքներ են իրականացվել>,- մանրամասնեց գնդապետը։
Խոսելով բանակում կատարված յուրացումների մասին, հրամանատար Գաբրիելյանը նշեց, չի կարելի բանակից ու զինվորից գողանալ, բայց կոնկրետ իրենց զորամասում նման խնդիր չի եղել։ «Ուրիշ հարց է, որ ասում են վառելիքը գողանում են, վաճառում են, ես համաձայն եմ, բայց միգուցե բանակում այնքան շատ է, որ մի մասը գողանում են մյուս մասը հերիքում է խնդիրները կատարելու համար (ժպտում է)։ Իհարկե, չի կարելի բանակից գողանալ»,- իր խոսքն ամփոփեց զորամասի հրամանատարը։
Հարցազրույցն ամբողջությամբ՝ տեսանյութում
