Այսօր ՀՀ-ում ԱՄՆ դեսպան Միլսը հայտարարեց, որ դեռ շատ վաղ է խոսել Հայաստանում նոր խոշոր ներդրումներ անելու մասին: Նախորդ իշխանությունների օրոք նույն դեսպանը խոսում էր էներգետիկայի ոլորտում 8 մլրդ-ի ներդրումների հնարավորության մասին: Ի՞նչ է փոխվել: ԱԺ փոխնախագահ Միքայել Մելքումյանն «Առաջին լրատվական»- ի հետ զրույցում անդրադառնալով այս հարցին՝ նշեց. «Մեր էներգետիկ համակարգը իսկապես տարածաշրջանում և՛ միջանցք լինելու, և՛ դիվերսիֆիկացման առումով բավականին մեծ պոտենցիալ ունի, սակայն խոսքն այդ մասին չէ, այլ այն մասին է, որ երբ որ Հայաստանում տեղի ունեցավ թավշյա հեղափոխություն, քաղաքական վերնաշենքը փոփոխության ենթարկվեց, եկան նոր ուժեր, որովհետև ժողովրդի կամքն էր դա, բայց դա չի նշանակում, որ անմիջապես մեծածավալ ներդրումներ պետք է ներհոսեին, քանի որ դեռևս տնտեսական համակարգում էական փոփոխություններ չեն եղել:
Հայտարարված է, որ մենաշնորհներ չկան, իսկապես այդպես է, կոռուպցիայի դեմ իսկապես հստակ պայքար է տարվում, բայց տնտեսական համակարգում պետք է լինեն խաղի հստակ կանոններ՝ ապագայի հետ կապված: Առայժմ տնտեսությունը չի կայունացել, կայունանալ ասելով՝ նկատի ունեմ այն, որ բավական չէ հարկային, մաքսային համակարգի ձերբազատվելը կոռուպցիայից, այլ կարևոր է նաև ներդրումների առումով պաշտպանված լինելը»:
Միքայել Մելքումյանի դիտարկմամբ՝ փոքր «հրդեհները շիջելու» համակարգին զուգահեռ պետք է լինի տնտեսական, սոցիալական քաղաքականության քայլերի, պարզ խաղի կանոնների համակարգ:
«Մենք հայտարարում ենք, որ Հայաստանի արտաքին քաղաքականության վեկտորի փոփոխություն չի լինելու… Դեմքով միայն դեպի Եվրոպա չէ, որ պետք է շրջվենք»,- նշեց Մելքումյանը:
Կա գնահատական, որ կառավարությունը տնտեսական հայեցակարգային քաղաքականություն դեռևս չունի. անդրադառնալով այս դիտարկմանը՝ Մելքումյանը նշեց. «Հակակոռուպցիոն պայքարում թիրախները ճիշտ են ընտրված: Սա ես ողջունում եմ, բայց այդ պայքարին զուգահեռ պետք է այնպիսի պայմաններ ստեղծել, որ կոռուպցիան արմատախիլ անելու արդյունքում ստեղծված բարենպաստ միջավայրից օգուտներ քաղես… Հարկերն աճել են, բայց շրջանառությունը նույնն է, գյուղական փոքրիկ խանութները կարող են փակվել: Պետք չէ, որ հեղափոխության արդյունքները տխուր հետևանքներ ունենան: Պետք է ռիսկով քայլեր կատարենք»:
Մանրամասն՝ տեսանյութում:
