Տավուշի մարզի ընդհանուր իրավասության դատարանում Ռաֆիկ Մելքոնյանի նախագահությամբ ավարտվել է Երվանդ Ղ.-ի գործի դատական քննությունը:
34-ամյա Երվանդին մեղադրանք էր առաջադրված բռնաբարության փորձի համար՝ ՀՀ քրեական օրենսգրքի 34-138 հոդվածի 1-ին մասով:
Ըստ մեղադրանքի՝ 2017 թվականի մայիսի 10-ին Իջևանում Երվանդ Ղ.-ն, գտնվելով իր գործընկերուհի Ռայա Ս.-ի վագոն-տնակում , նրա նկատմամբ բռնություն գործադրելով՝ գցելով հատակին, հարվածելով մարմնի տարբեր մասերին, ժամը 20-ից մինչև 23-ն ընկած ժամանակահատվածում փորձել է նրա կամքին հակառակ սեռական հարաբերություն ունենալ հետը, բայց հանցավոր մտադրությունը ավարտին չի հասցրել իր կամքից անկախ հանգամանքով պայմանավորված՝ Ռայայի որդին մտել է վագոն-տնակ ու խափանել է Երվանդի գործողությունները:
Երվանդ Ղ.-ն առաջադրված մեղադրանքում իրեն մեղավոր չի ճանաչել: Նա հայտնել է, որ բանվոր է, գործով տուժող Ռայան էլ իր գործընկերուհին է:
Դեպքի օրը՝ 2017 թվականի մայիսի 10-ին, ժամը 18-ի սահմաններում Իջևանի շուկայում հանդիպել է Ռայային: Միասին… օղի են խմել…
Հետո տեսնելով, որ Ռայան հարբել է, նրան տուն է տարել պատահական տաքսիով: Հասել են Ռայայի վագոն-տնակի մոտ: Քանի որ նա հարբած էր, ինքն էլ է իջել, Ռայային թևանցուկ է արել ու գնացել են դեպի վագոն-տնակ: Ռայայի հետ ներս է մտել: Ներսում Ռայան վայր է ընկել, ինքն էլ փորձել է նրան բարձրացնել, բայց Ռայան կծել է իր ձեռքը: Այդ պահին ներս է մտել Ռայայի որդին: Նա մորը հայհոյել է՝ հարբած լինելու համար: Ռայան էլ որդուն պատասխանել է, թե Երվանդը ուզում էր բռնաբարել:
Որդին մոր խոսքերից բարկացել ու մի երկու անգամ հարվածել է իր դեմքին: Ինքը փախել է նրանց տանից ու գնացել է իր տուն:
Ամբաստանյալը պնդել է, թե Ռայային բռնաբարելու փորձ չի արել, նրա տան իրերը չի թափթփել…
Տուժող Ռայա Ս.-ն հայտնել է, որ Երվանդն իր գործընկերն է, նրա ձախ ձեռքը հաշմանդամ է: Դեպքի օրն իրենք հանդիպել են շուկայի մոտ: Միասին օղի են խմել: Հետո նա իրեն տուն է ուղեկցել: Ինքը բացել է վագոն-տնակի դուռը, ներս է մտել, Երվանդն էլ իր հետևից է ներս մտել, խնդրել է իրեն սուրճ տալ: Երբ ինքը ցանկացել է հյուրասենյակից դուրս գալ, Երվանդն անսպասելի քաշել է իր մազերից, իրեն գցել է հատակին, նստել է իր վրա, սկսել է հայհոյել ու պահանջել, որ հետը սեռական հարաբերություն ունենա:
Ինքը չի ցանկացել, պահանջել է, որ նա հանգիստ թողնի իրեն ու հեռանա:
Երվանդն ուշադրություն չի դարձրել իր խոսքերին, հարվածել է իր մարմնի տարբեր մասերին, քաշքշել է հագուստը, պահանջել է այն հանել: Երվանդը իր վրա է շպրտել տան իրերը՝ վնասելով դրանք: Երվանդը մոտ երեք ժամ գտնվել է վագոն-տնակում, նա պահանջում էր, որ իրենք սեռական հարաբերություն ունենան, ուզում էր բռնաբարել իրեն, ինքը պաշտպանվելու ընթացքում անգամ կծել է նրա ձեռքը:
Երվանդը պատռել է իր կիսաշրջազգեստն ու զուգագուլպան: Հետագայում ինքը կիսաշրջազգեստը գցել է վառաևանի մեջ ու վառել է՝ չմտածելով, որ դա անհրաժեշտ է գործի քննության համար:
Ինքը ժամը 22-ից մինչև 23-ը հատակին ընկած էր: Հանկարծ լսել է շան հաչոց, տնակին մոտեցող ոտնաձայներ: Օգնություն է կանչել: Մուտքի դուռը բացվել ու ներս է մտել իր որդին: Ինքն ասել է, որ Երվանդը փորձում էր իրեն բռնաբարել: Որդին հարվածել է Երվանդին, նա փախել է իրենց տանից: Ոստիկանությունում ինքը հաղորդում է տվել հաջորդ առավոտյան…
Գործով վկա տաքսու վարորդը հայտնել է, որ դեպքի օրը շուկայի մոտ ուղևորի է սպասել, մոտեցել է Երվանդը ու ասել է, թե «վեշ» ունի տեղափոխելու: Ինքը կարծել է՝ նա գնումներ է կատարել, պայուսակ պիտի տեղափոխի: Մեքենան վարել է շուկայի հետնամաս ու տեսել է, որ այդ «վեշը» Ռայան է՝ հարբած վիճակում:
Երբ հասել են նրանց ասած փողոց, Երվանդը դժվարությամբ մեքենայից իջեցրել է Ռայային ու տարել է դեպի վագոն-տնակը: Այդ կինն այնքան հարբած էր, որ բան չէր գիտակցում, իսկ Երվանդը սթափ էր:
Իջևանի շուկայում աշխատողները նշել են, որ դեպքի օրը Ռայան հարբած-ընկած էր շուկայի հետնամասում… Երվանդը տաքսիով նրան տուն է տարել…
Դատարանը հաշվի է առել, որ Երվանդ Ղ.-ն վատառողջ է:
Երվանդ Ղ.-ն մեղավոր է ճանաչվել բռնաբարության փորձի համար՝ ՀՀ քրեական օրենսգրքի 34-138 հոդվածի 1-ին մասով, դատապարտվել է 3 տարի ազատազրկման, նրա նկատմամբ պայմանական դատապարտություն է կիրառվել, սահմանվել է 2 տարի փորձաշրջան: