«Ինձ մոտ այնպիսի տպավորություն է, որ մեր ընդդիմադիր ուժերը, որոնք ներկայացված են Երևանի ավագանիում, այդքան էլ պատրաստված չէին այսպիսի շուտ հրաժարականի, որովհետև եթե պահանջում ես հրաժարական, ապա գոնե պետք է պատկերացնես, թե ինչ է հաջորդելու հրաժարականից հետո և այս առումով ինձ թվում է, որ նրանք ցայտնոտի մեջ են գտնվում, մինչդեռ այս իրավիճակը նրանց համար պետք է սպասելի լիներ»,- «Առաջին լրատվական»-ի հետ զրույցում նշեց Gallup International Association-ի հայաստանյան ներկայացուցչության տնօրեն Արամ Նավասարդյանը՝ անդրադառնալով Տարոն Մարգարյանի հրաժարականին ու Երևանի նոր քաղաքապետի ընտրության հարցին։
Նշենք, որ հուլիսի 16-ին Երևանի ավագանու նիստում պետք է որոշվի Երևանի քաղաքապետ ընտրվում է եղած ավագանու կազմից, թե ավագանին լուծարվելու է և նշանակվելու են նոր ավագանու ընտրություններ։ Նկատենք նաև, որ այս պահի դրությամբ քաղաքապետի թեկնածու առաջադրվել է միայն «Երկիր Ծիրանի» կուսակցության կողմից Զարուհի Փոստանջյանը, իսկ ՀՀԿ-ն ու «Ելք» խմբակցությունները թեկնածու դեռևս չեն առաջադրել։
Գնահատելով Զարուհի Փոստանջյանի քաղաքապետ ընտրվելու հավանականությունն ու նրա շանսերը, Արամ Նավասարդյանը նշեց․ «Չեմ կարծում, որ «Երկիր Ծիրանի»-ն ունենա մեծամասնություն․ այո, նրանք փորձել են ակտիվ գործել, բայց հաշվի առնելով «Ելք»-ի հաջողությունները՝ հիմա որպես ընդդիմադիր ավելի շատ ընկալվում է «Ելք»-ը։ Զարուհի Փոստանջյանը որպես ընդդիմադիր գործիչ՝ ըստ մեր հետազոտությունների մշտապես հավաքել է բարձր ցուցանիշներ, բայց պատկերն այս թավշյա հեղափոխությունից հետո բավականին փոխվել է, այսինքն նրա ընդդիմադիր կեցվածքը հիմա չի հասկացվում՝ ընդդիմադիր ես ո՞ւմ հանդեպ՝ Նիկոլ Փաշինյանի՞, հա՞ , թերևս ինձ համար սա անհասկանալի է, որովհետև ընդդիմադիր լինելու պահանջարկը հիմա նվազել է»։
Մեր զրուցակցի դիտարկմամբ՝ լրջագույն խնդիր է այն, որ այս կամ այն ընտրությունների ժամանակ քաղաքական գործիչները փորձում են մեսիջներ ուղարկել մեկը մյուսին, դրա փոխարեն պատշաճ ուշադրություն չդարձնելով իրենց ընտրվելու ծրագրի բովանդակությանը։
«Երևանը այն քաղաքը չէ, որ բավարարվի միայն լոզունգներով, այդ լոզունգներով Երևանը չի ապրում, պետք է մի այնպիսի թիմը, որը կարողանալու է այդ բոլոր խնդիրները լուծել, իսկ Երևանը շատ բարդ և լուրջ տնտեսություն է»,-նկատեց Նավասարդյանը։
Մանրամասները՝ տեսանյութում։