«Ես Վահագն Հարությունյանին շատ լավ եմ ճանաչում, նա իր ամբողջ գործունեությամբ տապալել է Մարտի 1-ի գործի բացահայտումը։ Գործի չբացահայտման հիմնական մեղավորներից մեկն էլ Վահագն Հարությունյանն է»,- «Առաջին լրատվական»-ի հետ զրույցում ասաց Մարտի 1-ի զոհերից Գոռ Քլոյանի հայրը՝ Սարգիս Քլոյանը՝ անդրադառնալով Քննչական կոմիտեի ղեկավարի տեղակալ, գնդապետ Վահագն Հարությունյանի հրաժարականին։
Հիշեցնենք, որ այսօր Վահագն Հարությունյանը հրաժարականի դիմում է ներկայացրել, թեև լուրջ հավակնություններ ուներ դառնալ Աղվան Հովսեփյանին փոխարինող, այսինքն՝ Քննչական կոմիտեի ղեկավար և դրա համար ջանք ու եռանդ չէր խնայում, բացահայտումներ էր իրականացնում՝ հիմնավորելու ՔԿ ղեկավարի պաշտոնում իր նշանակման անհրաժեշտությունը։ Սակայն ինչպես ասում են, շաբաթը ուրբաթից շուտ եկավ, և Հարությունյանը առհասարաակ հեռացավ համակարգից։
Ավելին, շատերը կարծում են, որ միայն հեռացումով պետք չէ բավարարվել։ «Ճիշտ է, Վահագն Հարությունյանը հրաժարական է տվել, բայց դա չի նշանակում, որ նա փրկել է իր կաշին։ Նա պետք է պատասխանատվության ենթարկվի, ցուցմունք տա, ասի, թե ինչի համար չի կարողացել բացահայտել Մարտի 1-ը, ով է իրեն կարգադրել կոծկել գործը, շեղել քննությունը։ Նա պետք է անպայման Մարտի 1-ի գործով հարցաքննվի և հայտնվի մեղադրյալի աթոռին։ Դա միանշանակ է»,- ասաց Քլոյանը՝ հավելելով, որ Վահագն Հարությունյանը միանշանակ հրահանգ է կատարել և պետք է հայտարարի, թե ում հրահանգն է կատարել և ինչու։
«Բա ի՞նչ էր իրենց թվում, պետք է ինչ ուզում են անեին, հետո գնային հանգիստ վայելեին իրենց կյանքը։ Չի լինելու նման բան։ Ե՛վ Աղվան Հովսեփյանը, և՛ Վահագն Հարությունյանը, և՛ այս գործով մի շարք քննիչներ պետք է հայտնվեն մեղադրյալի աթոռին։ Եթե իրենք հրաժարական են տալիս, նշանակում է, որ արդեն զգում են վտանգը։ Դրա համար ուրախ եմ, բայց, իհարկե, կարծում եմ, որ արդարադատությունը պետք է մինչև վերջ գնա։ Ինձ համար հեղափոխությունը դա Մարտի 1-ի ամբողջական բացահայտումն է»,- ասաց Մարտի 1-ի զոհերից Տիգրան Խաչատրյանի մայրը՝ Ալլա Խաչատրյանը։
Իրավապաշտպան Վարդան Հարությունյանի խոսքերով էլ՝ Վահագն Հարությունյանի աշխատանքից ազատվելը չի նշանակում ազատվել ծավալած գործունեության համար պատասխանատվությունից։ «Այսօր Մարտի 1-ի գործով քննություն է ընթանում և ես հուսով եմ, որ բոլոր նրանք, այդ թվում և ձեր նշած անձնավորությունը, ովքեր ներգրավված են եղել այս գործում, յուրաքանչյուրն իր մեղքի չափով ու օրենքի պահանջներին համապատասխան պատասխան կտա»,- ընդգծեց իրավապաշտպանը։
