«Առաջին լրատվական»-ի հարցին՝ ինչպիսի՞ն է Ձեր բնորոշումը, գնահատականը ԱԱԾ-ի, ոստիկանության, ՊԵԿ-ի կողմից իրականացված բացահայտումների հետ կապված, ԱԺ Հանրապետական խմբակցության պատգամավոր Խոսրով Հարությունյանն ասաց․ «Հիմա քննարկվում կամ ուսումնասիրվում են մարդիկ, անհատներ, որոնք ուղղակի կամ անուղղակի կապ են ունեցել իշխանության հետ։ Դա բոլորովին այլ խնդիր է։ Ցավում եմ, որ նման պարագաների հետ ենք հանդիպում, ու կարծում եմ, որ այս ամենը լուրջ հետևություններ անելու հիմք է յուրաքանչյուրիս համար։
Կարծում եմ՝ հանրային կյանքի առողջացման այս պրոցեսը չպետք է վերածվի վհուկների որսի։ Իմ պատկերացմամբ՝ այս խնդիրների լուծման համար համակարգային փոփոխություններ է պետք, որ հետագայում նման դեպքեր չկրկնվեն։ Վերջին հաշվով, այն, ինչ մենք այսօր տեսնում ենք, օրենքի բացթողման արդյունք է՝ հնարավոր է եղել օգտվել օրենքի սողանցքներից»։
Խոսրով Հարությունյանը հավելեց, որ այս ամենը չպետք է վերագրել մի քաղաքական ուժի, որովհետև այն համակարգը, որ այսօր գոյություն ունի, ձևավորվել է դեռ 90-ականներին։
«Իմ պատկերացմամբ՝ պետք է այնպես անել, որ քաղաքական իշխանությունը պոտենցիալ առումով չդառնա տնտեսական իշխանության տրամաբանական շարունակությունը։ Սա շատ լուրջ հարց է»,- ասաց պատգամավորը։
Ամբողջությամբ՝ տեսանյութում։
