Հայաստանը լճացումից ու ճահճացումից կհանի ոչ թե ինքնանպատակ պլանային վրեժխնդրությունը, այլ խաղի նոր կանոնների՝ անշրջելի և անբեկանելի օրինականության և հավասարության հաստատումը: Հայաստանից խլված ռեսուրսները կվերադարձվեն և կծառայեն նոր իրավիճակին, հանրությանն ու պետությանը:
Կոռուպցիայի դեմ պայքարում ամեն նոր բացահայտում նորանոր մտորումների տեղիք է տալիս, թե մինչև ուր կարող է հասնել մարդկային միտքը՝ սեփական պետության կեղեքման և ոչնչացնելու իմաստով: Մինչև ո՞ւր կարող է հասնել կոռուպցիայի դեմ պայքարը:
Թեմայի շուրջ «Առաջին լրատվական»- ի հետ զրույցում ՀՀ վարչապետի օգնական Արեն Մկրտչայնը նշեց. «Ինչպես արդեն հայտարարվել է՝ կոռուպցիան նոր Հայաստանում տեղ չի ունենալու, կոռուպցիայի դեմ անզիջում պայքար է մղվելու, կոմպրոմիսներ չեն լինելու: Այս անզիջում պայքարում կա բավարար գիտելիք, կամք և համարձակություն, վստահաբար կարող եմ ասել, որ ոչ ոք և ոչինչ չի կարող վախեցնել մեզ՝ արմատախիլ անելու այս արատավոր երևույթը:
Աշխատանքները շարունակվում են: Ինֆորմացիայի հավաքագրման և մշակման փուլը մի շարք ուղղություններով շարունակվում է: Կոռուպցիայի դեմ պայքարը իսկապես անզիջում է լինելու: Կոռումպացված Հայաստանը հուղարկավորվեց 2018թ. մայիսի 18-ին»:
ԱԺ «Ելք» խմբակցության պատգամավոր Հայկ Կոնջորյանի խոսքով՝ այն գործընթացը, որը սկսվեց մայիս-ապրիլ ամիսներին և ավարտվեց Հայաստանում հեղափոխության արդյունքում իշխանափոխությամբ, շղթայաբար տարածվելու է:
«Դրա դրսևորումները տեսնում ենք նաև քաղաքապետների հրաժարականներով, որովհետև նախկին համակարգի բուրգը հիմնված է եղել լեգիտիմության մեծ դեֆիցիտի վրա, որը կոմպենսացվել է բիրտ ուժի, ադմինիստրատիվ լծակների, կոռուպցիայի, ստվերային գործարքների շնորհիվ, իսկ այսօր ադմինիստրատիվ նախկին ռեսուրսը գոյություն չունի, գույություն չունեն կոռուպցիոն աշխատող մեխանիզմներն ու գործիքակազմերը, և ստվերային պայմանավորվածություններն իշխանության հետ քանդվել են: Նախկին իշխանության տարբեր օղակներն այլևս հենարան չունեն և չեն կարողանում շարունակել իրենց գործունեությունը»,- նշեց պատգամավորը:
Նրա դիտարկմամբ՝ այս գործընթացում կա որոշակի տարերայնություն, բայց գործում է դոմինոյի էֆեկտը. «Այսինքն՝ առաջին քայլն անում ես, և դրանից հետո էֆեկտը սկսում է աշխատել, և դա դրական է»:
Մանրամասն՝ տեսանյութում:
