ԱՄՆ քաղաքացի Ռոբերտ Լևինսոնը, ով ավելի քան 6 տարի առաջ անհետացել էր Իրանում, այնտեղ է գտնվել ԿՀՎ հանձնարարությամբ, ոչ թե մասնավոր գործնական այցով՝ ինչպես պաշտոնապես պնդում է ԱՄՆ կառավարությունը: Նման եզրակացության են եկել AP գործակալության լրագրողները սեփական հետաքննության անցկացումից հետո:
Ֆլորիդայի Քորալ Սպրինգս քաղաքի 60-ամյա բնակիչ Լևինսոնը անհետացել էր 2007-ի մարտին՝ Իրան այցի ժամանակ: Վերջին անգամ նրան տեսել են Քիշ կղզում: Նախկինում Լևինսոնն աշխատել էր Հետաքննությունների դաշնային բյուրոյում և զբաղվել քրեական գործերով: Սակայն, ինչպես պաշտոնապես հաստատվել է, նա բյուրոյից հեռացել էր 1998 թվականին:
AP-ի տվյալներով՝ FBI-ից հեռանալուց հետո նա որոշ ժամանակ աշխատել է որպես մասնավոր խուզարկու, իսկ 2006-ի հունիսին սկսել է համագործակցել ԿՀՎ-ի հետ:
Նշվում է, որ գերատեսչությունը նրա ընտանիքին 2.5 մլն դոլար է տրամադրել, որպեսզի վերջինս հայցով դատարան չդիմի:
Թե այժմ որտեղ է գտնվում Լևինսոնը, և թե Իրանի կառավարությունն ուղիղ կապ ունի՞ նրա անհետացման հետ՝ հայտնի չէ: Մինչ օրս իրանական իշխանությունները հայտնում են, որ տեղեկություն չունեն նրա մասին:
