Երբեմն պատկերավոր և այլաբանական արտահայտություններն ավելի դիպուկ են նկարագրում քաղաքական ուժերի մտադրությունները, քան` երկարաշունչ ելույթներն ու ծրագրերը:
Կառավարության ծրագրի քննարկման ժամանակ ՀՀԿ փոխնախագահ Արմեն Աշոտյանն երեկ Նիկոլ Փաշինյանին դիմել է 20-րդ դարասկզբի Ֆրանսիայի վարչապետներից մեկի` Ժորժ Կլեմանսոյի` «դուք մեծ արտիստ էիք, դարձաք շարքային վարչապետ» թևավոր արտահայտությամբ: Դրանից առաջ և հետո Աշոտյանի ասածներն այնքան էլ կարևոր չեն, որովհետև Կլեմանսոյի բերանով նա փորձում է կանխատեսել Փաշինյանի թիմի ձախողումը, ֆիասկոն, համենայն դեպս` Հայաստանում այդպիսի քաղաքական ճակատագիր են ունեցել շարքային վարչապետները:
Ընդդիմադիր տրամաբանության տեսանկյունից` ՀՀԿ ցանկությունը նույնիսկ մոտիվացված է, այլ խնդիր է, որ բոլոր առումներով ՀՀԿ-ն ոչ դասական, ոչ ստանդարտ ընդդիմություն է: Հասարակությունը նման ընդդիմություն ձևավորելու մանդատ չի տվել, սակայն շատ ավելի էական է այն հանգամանքը, որ ՀՀԿ-ն ընդդիմադիր է ոչ այնքան կոնկրետ կառավարության քաղաքականությանը, որքան` հեղափոխական համատեքստին: Եթե այդ համատեքստը վերանում է, Փաշինյանը դառնում է շարքային վարչապետ, ընդ որում` օտարների միջավայրում:
Գուցե պարադոքսալ հնչի, սակայն քսան տարի կառավարության ղեկին գտնված ուժը, որը գոնե այս պահին խորհրդարանում ունի ամենամեծ խմբակցությունը, ըստ էության` արտահամակարգային ընդդիմություն է` հեղափոխության չեղարկման օրակարգով: Հեղափոխության համար նման ընդդիմությանը պարտվելը հակացուցված է` քաղաքական, արժեքային հարթությունների վրա:
Մյուս կողմից` եթե արագ չհաղթահարվի քաղաքական վակուումը և հեղափոխության ինստիտուցիոնալիզացիայի հաջորդ փուլում չձևավորվի հետհեղափոխական Հայաստանի իրական ընդդիմություն` դեմոկրատական հակակշիռ, ապա արտահամակարգային ընդդիմության դեմ հաղթանակը կարող է հանգեցնել հեղափոխական դիկտատուրայի:
Նիկոլ Փաշինյանն անուղղակի, դարձյալ` այլաբանորեն, հակադարձել է Աշոտյանին` ասելով, թե ինքն ունի կախարդական փայտիկ: Այս հայտարարությամբ Փաշինյանը իրեն սահմանազատում է «շարքային», լուզեր վարչապետներ Տիգրան Սարգսյանից, Հովիկ Աբրահամյանից, Կարեն Կարապետյանից, որոնք կառավարություն էին եկել ոչ թե կախարդական փայտիկով, այլ` երկաթե շերեփով` քրեաօլիգարխիայի կաթսայից մեծ բաժին տանելու համար:
Կախարդական փայտիկը հեղափոխության տված բանալին է, որը Փաշինյանին հնարավորություն է տվել` բացել նոր համակարգի դուռը, որտեղ բացակայում են մենաշնորհներն ու կոռուպցիան, իշխանական արտոնություններն ու խեղճերի նվաստացումը:
Կառավարության ծրագրի քննարկումներն իրապես ինդիկատորայ ին էին, որովհետև բացահայտեցին քաղաքական դիմակայության բաժանարար գիծը: Այն անցնում է` ոչ թե իշխանություն-ընդդիմություն, այլ` երկու հակամարտ համակարգերի` հեղափոխության և հակահողափոխության սահմանագծով:
Առաջիկա խորհրդարանական արտահերթ ընտրություններն` անկախ ժամկետներից, չեն կարող մրցակցային լինել, որովհետև ընթանալու են հենց հեղափոխության և հակահեղափոխության(պարտադիր չէ ՀՀԿ-ի դեմքով) պայքարի ռեժիմով: Մինչև հակահեղափոխությունը չպարտվի, չենք ունենալու կառավարություն` դասական իմաստով, և ընդդիմություն` դեմոկրատական հակակշռի ինստիտուցիոնալ դերակատարությամբ:
