ՀՀ առաջին փոխվարչապետ Արարատ Միրզոյանը հույս ունի, որ ՀՀԿ խմբակցությունից դուրս եկողների որոշումներում էական դեր է խաղում պետության մասին մտածելու, նոր կառավարությանն աջակցություն ցուցաբերելու մղումը: Այս մասին Արարատ Միրզոյանը նշեց Երևանում անցկացված Միացյալ Թագավորություն-Հայաստան գործարար համաժողովի ժամանակ լրագրողների հետ զրույցում: Լրագրողի այն հարցին, թե արդյոք Հանրապետական խմբակցությունից գործարարների դուրս գալը կապվա՞ծ է ԱԱԾ-ի վերջին բացահայտումների հետ՝ Արարատ Միրզոյանը նշեց, որ հակված չէ շատ տարբեր գործոններ միմյանց հետ կապել:
«Իրականում առանցքային գործոնն այն է, որ նոր Հայաստան ենք կառուցում, գիծ ենք քաշել: Գիտենք, որ բազմաթիվ մարդիկ, հին խաղի կանոններով պայմանավորված, զանազան սխեմաների մեջ են ընդգրկված եղել: Մենք հայտարարել ենք, որ այսուհետև բիզնեսը ստիպված չէ ստվերային տնտեսություն վարել, ստիպված չէ դիպլոմատներով առանձին գումարներ տալ: Բիզնեսը պետք է գործի օրինական և վճարի հարկերը: Նոր խաղի կանոններում բիզնեսը ստիպված չէ քաղաքական կապերով կապվել: Ինչ վերաբերում է ՀՀԿ խմբակցությունից պատգամավորների դուրս գալուն, ապա ես մեծ հույս ունեմ, որ այդ որոշումների մեջ էական դեր է խաղում պետության մասին մտածելը, նոր կառավարությանն աջակցություն ցուցաբերելու մղումը»,- «Արմենպրես»-ի հաղորդմամբ, ասաց Արարատ Միրզոյանը:
«Արտահերթ ընտրություններից հետո արդյոք գործարար պատգամավորներ խորհրդարանում չե՞ն լինի» հարցին ի պատասխան Արարատ Միրզոյանը նշեց, թե միշտ հայտարարել են, որ բիզնեսը չպետք է հետաքրքված լինի իշխանական օղակներին մաս կազմելու հարցով:
«Մենք բոլորս գիտենք, որ բիզնեսը ցանկացել է հայտնվել խորհրդարանում, որպեսզի անձեռնմխելիթյուն ունենա, երաշխիքներ ձեռք բերի բիզնեսը պաշտպանելու համար: Հիմա դրա անհրաժեշտությունը չկա: Կստեղծվեն անհրաժեշտ օրենսդրական մեխանիզմներ, գործարարը հանգիստ գնա իր գործով կզբաղվի»,-ասաց նա:
Արդյոք նույն վերաբերմո՞ւնքն է լինելու Գագիկ Ծառուկյանի նկատմամբ, հարցին ի պատասխան՝ Արարատ Միրզոյանը նշեց, որ անուններ չի տալիս և նշում է, որ խաղի կանոնները բոլորի համար հավասար են:
