Հայ-վրացական հարաբերությունները բարեկամական և գործընկերային են եղել Երրորդ հանրապետության ողջ ընթացքում, սակայն դրանցում մի տեսակ բացակայել են քաղաքական, ռազմավարական բաղադրիչները:
Պաշտոնական այցով Թբիլիսիում գտնվող վարչապետ Նիկոլ Փաշինյանը, Վրաստանի իր գործընկեր Գիորգի Կվիրիկաշվիլիի հետ համատեղ ասուլիսում, հանդես է եկել խիստ ուշագրավ հայտարարություններով, որոնք կարող են որակական նոր հարթության վրա դնել երկկողմ հարաբերությունները:
Նա նշել է, որ Վրաստանի գործընկերոջ հետ քննարկել է հայ-վրացական հարաբերություններում երկարաժամկետ տեսլականի անհրաժեշտությունը: «Համոզված եմ, որ մենք ունենք երկարաժամկետ և կարճաժամկետ ընդհանուր շահեր, և մենք պետք է ամեն ինչ անենք ոչ միայն կարճաժամկետ շահերի օպերատիվ խնդիրները լուծելու համար, այլ նաև պետք է մտածենք երկարաժամկետ կտրվածքով, որպեսզի կարողանանք իրողություններն ավելի մասշտաբային գնահատել և այսօրվա գործողությունները կառուցել ապագայի և երկարաժամկետ համագործակցության տրամաբանությամբ»,- շեշտել է վարչապետը:
Փաշինյանի այս հայտարարությունը հայ-վրացական հարաբերություններին հաղորդում է ռազմավարական բաղադրիչ: Երկու երկրների հարաբերություններն օբյեկտիվորեն այդպիսին են, սակայն ռազմավարական օրակարգի ձևավորմանը խանգարել են օբյեկտիվ և սուբյեկտիվ մի շարք խոչընդոտներ: Դրանցից մի քանիսը` հատկապես մրցունակ պետության մոդելի բացակայությունը և ինքնուրույն արտաքին քաղաքականություն վարելու անկարողությունը, թավշյա հեղափոխությունը վերացրել է: Հատկանշական է, որ պաշտոնական առաջին այցի ընթացքում արդեն տեսանելի է հեղափոխության էական ազդեցությունը արտաքին քաղաքականության վրա: Նիկոլ Փաշինյանի խոսքը կառուցված էր ակտիվ, նախաձեռնող քաղաքականության մեկնակետից և բացարձակապես պատահական չէ, որ Հայաստանի վարչապետը կարևորել է երկկողմ հարաբերությունների ռազմավարական բաղադրիչը:
Փաշինյանն, իհարկե, չի բացել փակագծեր և չի ներկայացրել երկարաժամկետ համագործակցության իր տեսլականը կամ գուցե դա արել է Վրաստանի իր գործընկերոջ հետ փակ հանդիպման ժամանակ, սակայն ակնհայտ է, որ թավշյա հեղափոխությունը էապես բարձրացրել է Հայաստանի տարածաշրջանային կշիռը, ինչը Հայաստանի վարչապետին թույլ է տալիս խոսել հավակնոտ, ապագային միտված ծրագրերի մասին:
Անկախ արտաքին քաղաքական կողմնորոշումների տարբերությունից` Հայաստանն ու Վրաստանը տարածաշրջանում բնական դաշնակիցներ են` հիմքում ունենալով երկու երկրների դեմոկրատական մոդելը, որն անխուսափելիորեն նույն քաղաքակրթական, քաղական զարգացման ճանապարհի վրա է դնելու երկու երկրներին:
Հայ-վրացական հարաբերություններն ինքնին կարող են տարածաշրջանային համագործակցության և անվտանգային նոր միջավայրի ձևավորման մոդել դառնալ:
Պատահական չէ, որ Նիկոլ Փաշինյանը Վրաստանի վարչապետի հետ հանդիպման ընթացքում կարևորել է տարածաշրջանային կայունությունը: «Մենք տարածաշրջանային կայունության, անվտանգության և խաղաղության շուրջ քննարկումներ ունեցանք: Այստեղ նույնպես մենք պետք է մեր ջանքերը համատեղենք, քանի որ տարածաշրջանային խաղաղությունը կարևոր գերակայություն է մեզ համար և հետագա զարգացումների կարևոր նախապայման է»,-ասել է Նիկոլ Փաշինյանը:
Անցած տարիներին հայ-վրացական հարաբերություններում թույլ, նույնիսկ անտեսված է եղել հենց ռեգինալ համատեքստը` իր ինտեգրացիոն և անվտանգային բաղադրիչներով:
Նիկոլ Փաշինյանի այսօրվա պաշտոնական այցը լրացնում է հենց այդ բացը:
