Թայլանդում ըմդդիմադիրները պահանջում են, որ կառավարությունն անմիջապես հրաժարական տա, նրանք բողոքի զանգվածային ակցիա են սկսել, հակամարտող կողմերը զենքի են անցել, հայտնում է ITAR-TASS-ը:
Թայլանդի վարչապետ Ինգլակ Չինավաթը հասցրել է դուրս գալ ազգային ոստիկանության սպորտային համալիրից, որտեղ նա գտնվել է, երբ հաստատության տարածք են ներխուժել ընդդիմության կողմնակիցները:
Ցուցարարները շարժվել են 15 հիմնական ուղղություններով՝ նպատակ հետապնդելով պաշարել պետական հաստատությունները, գործակալությունները և հեռուստաալիքները:
Երկրի վարչապետն ընդդիմությանը կոչ է արել դադարեցնել բողոքի ակցիաները: Ավելի վաղ նա խոստացել էր, որ ոստիկանությունը կաշխատի ուժ չգործադրել: Սակայն ցուցարարների դեմ արդեն արցունքաբեր գազ, ջրցաններ են օգտագործվել:
Բախումները տեղի են ունեցել Բանգկոկի կենտրոնում՝ կամրջի վրա: Կառավարության շենքի առաջ բետոնե սալիկներ և փշալար է դրված: Կարգը պահպանում է գրեթե 9 000 ոստիկան:
Նոյեմբերի 30-ի երեկոյան Բանգկոկում հօգուտ վարչապետի «կարմիրշապիկավորների» հարյուրհազարանոց ցույց է անցկացվել, որն ավարտվել է ընդդիմադիրների հետ զանգվածային բախումով: Կողմերը բռունցքներից անցել են զենքի:
Կրակոցները շարունակվել են մինչև առավոտ: Զոհվել է մեկ մարդ, ավելի քան 45-ը վնասվածքներ է ստացել:
