ԱՄՆ-ում «սև ուրբաթի» ժամանակ, երբ խանութներում զեղչերը հասնում են մինչև 90%-ի, գնորդների միջև արդեն գրանցվել են զանգվածային ծեծկռտուքի դեպքեր:
Ինչպես հաղորդում է The Huffington Post-ը, Նյու Յորքի Walmart առևտրի կենտրոններից մեկում վիճաբանություն է սկսվել գնորդների միջև այն բանից հետո, երբ վերջիններս հասկացել են, որ բոլոր ցանկացողներին ապրանքը չի հասնի: Ոստիկանությունը միջամտել է տեղի ունեցածին, ձերբակալվել է մի քանի մարդ:
Կալիֆոռնիայում՝ Սան Բեռնարդո քաղաքում, ծեծկռտուքի ժամանակ տուժել է ոստիկան, երբ նա փորձել է բաժանել երկու գնորդներին: Նույն նահանգի Ռեալտո քաղաքում ևս վիճաբանություն է ծագել հերթում կանգնած գնորդների միջև, կիրառվել է հրազեն, ձերբակալվել է տեղի բնակիչներից մեկը:
Նյու Ջերսի նահանգում ոստիկանությունը ստիպված է եղել կիրառել պղպեղի գազ՝ Walmart խանութում վիճաբանությունը կանխելու համար: Վիրջինիայում նույն խանութների ցանցում գնորդներից մեկը դանակով վիրավորել է մյուսին: Ծեծկռտուքներ են տեղի ունեցել նաև Չիկագոյում, Լաս Վեգասում. կան տուժածներ:
Միևնույն ժամանակ ամերիկացիների մի մասն էլ նշում է բողոքի օրը՝ Buy Nothing Day-ը, հրաժարվելով ինչ-որ բան գնել: Նախօրեին երկրով մեկ տեղի են ունեցել բողոքի զանգվածային ցույցեր, գործադուլներ, որոնք կազմակերպել էին մատակարարման ոլորտի աշխատակիցները, ովքեր զեղչերի սեզոնին ստիպված են աշխատել առանց հանգստի: Նրանք բողոքել են ցածր աշխատավարձերի, աշխատանքի վատ պայմանների դեմ: Ակցիաների հետևանքով ոստիկանությունը ձերբակալել է 10 մարդու:
