ԱԻՆ հիդրոմետ ծառայության օդերևութաբանության կենտրոնի պետի տեղակալ, աշխարհագրական գիտությունների թեկնածու Գագիկ Սուրենյանը այսօր լրագրողների հետ հանդիպմանը խոսելով աշնան երեք ամիսներին հանրապետությունում գրանցված ջերմաստիճանի մասին՝ ասաց, որ այն հիմնականում եղել է նորմային մոտ, մի փոքր դրական շեղումներով: Առանձին հատվածներում, հատկապես հյուսիսայն շրջաններում, տեղումները եղել են նորմայից ավել:
Առաջիկա երկու օրերին՝ նոյեմբերի 29-ին և 30-ին, հանրապետության տարածքը գտնվելու է Միջերկրական ծովից թափանցած ցիկլոնի ազդեցության գոտում, ժամանակ առ ժամանակ տեղումներ կլինեն, առանձին հատվածներում կլինի նաև մառախուղ:
Դեկտեմբերի 1-ից ցիկլոնը կհեռանա և մինչև 4-ը կգրանցվի առանց տեղումների եղանակ:
Առաջիկա օրերին՝ նոյեմբերի 30-ի ցերեկը և դեկտեմբերի 1-ի գիշերը, ջերմաստիճանը կնվազի 4-6 աստիճանով:
Անդադառնալով 2013-2014 թթ. ձմռան եղանակին՝ Գ. Սուրենյանը նշեց, որ այս տարի կդիտվի համեմատաբար մեղմ ձմեռ՝ շատ տեղումներով. «Ձմռան սկզբին հատկապես տաք կլինի դեկտեմբերի առաջին տասնօրյակը, իսկ հունվար և փետրվար ամիսներին ջերմաստիճանը նորմայից բարձր կլինի»:
Ինչ վերաբերում է տեղումներին, ապա դրանք կլինեն միջինից բարձր, իսկ բարձր ձերմաստիճանի դեպքում՝ հիմնականում անձրևի տեսքով: