Հայաստանի Հանրապետության տնտեսական քաղաքականությունը չի համապատասխանում մեր երկրի առջև ծառացած մարտահրավերներին. Հայաստանը պատերազմի մեջ ներքաշված երկիր է, և առանց ազգային ու պետական կարողությունների ամբողջական լիարժեք գործարկման` ռազմական, ծանր և թեթև արդյունաբերության, ինքնաբավ գյուղատնտեսության, գոյատևել չի կարող: Գաղտնիք չէ, որ Հայաստանում առկա են վերականգնման հնարավորություն ունեցող արդյունաբերական ձեռնարկություններ, որոնց գործարկումը անհրաժեշտ է, իրատեսական է և, սրտացավ մոտեցում ցուցաբերելու դեպքում, հնարավոր է: Զարգացած արդյունաբերություն ունեցող տնտեսություն կայացնելը համալիր գործընթաց է, որի խթանիչ կատալիզատորներից է քիմիական արտադրությունը: Այս առումով առաջնահերթ ենք համարում «Նաիրիտ» գիտաարտադրական միավորումը. «Նաիրիտի» վերագործարկման խնդիրը չարչրկվում է արդեն երկու տասնամյակից ավելի: Տեղյակ ենք, որ եղել են և կան պատրաստակամություն հայտնած ներդրող ընկերություններ, որոնք վերագործարկման հայտ են ներկայացրել ՀՀ կառավարություն, մասնավորապես` EU-Asia Business Finance Center Holding-ի կազմում ստեղծված Nairit-EU Gonsortium-ի ներկայացուցիչները` Sunir Co (Իրան), ChimRemonStroy L.T.D. Planets (Բուլղարիա), IPMLLP(Անգլիա), սակայն նրանց գործընթաց սկսելու հնարավորություն չի ընձեռվել:
Մեզ պետք է պարզաբանում. ինչ հիմնավորումով է մրցույթն անտեսվել և սնանկացման գործընթաց սկսվել: Մեր կարծիքով «Նաիրիտը» հեռանկարային, շահավետ ձեռնարկության է, իսկ նրա արտադրանքն ու աշխատատեղերը Հայաստանին խիստ անհրաժեշտ են:
Այժմ շրջանառվում է «Նաիրիտի» քացախաթթվի արտադրության տեխնոլոգիական գծի վաճառքի մասին հայտարարությունը: Մենք դա համարում ենք սխալ` չհիմնավորված, հապճեպ որոշում. Գիտաարտադրական միավորման լիարժեք գործարկման պարագայում այդ արտադրությունն անհրաժեշտ ու շահավետ է լինելու:
Առաջարկում և պահանջում ենք կասեցնել «Նաիրիտ»-ի սնանկության՝ գույքի օտարման գործընթացը, հնարավորություն ընձեռել շահագրգիռ ներդրողներին, իրենց միջոցների հաշվին, իրականացնելու ձեռնարկության տեխնիկական աուդիտ` ձեռնարկության առողջացման ծրագիր ներկայացնելու և այն քննարկելու համար:
Կառավարությունից ակնկալում ենք` հայոց պետության պաշտպանունակության խնդիրներով մտահոգ մասնագետների հետ քննարկումների և համագործակցային որոշում ընդունելու հնարավորություն:
Մեր պատրաստակամությունն ենք հայտնում մասնակցելու հարցի քննարկմանը` <<Հայ մասնագետների խորհրդի>> դիրքորոշում-պնդումը հիմնավորելու համար:
Հարգանքով՝ «Հայ մասնագետների խորհրդի» անդամներ /այբենական կարգով/
Ալեքսանյան Կառլեն-գ. թ., կիրառական մաթեմատիկա,
Ավետիսյան Ռաֆայել-գ. թ., ֆիզիկոս-տեխնոլոգ,
Արզումանյան Արտավազդ-գ . թ. Ճարտարապետաշինարարական համ.-ի ամբիոնի վարիչ,
Բեժանյան Նուրիսա-կիսահաղորդչային սարքերի ինժեներ-տեխնոլոգ,
Բեկլարյան Լևոն- գ.դ, տնտեսագիտության ինստիտուտ, Մոսկվա,
Գևորգյան Աշոտ- գ.դ., ԳԱԱ,
Գևորգյան Սամվել-գ.դ., ԵՊՀ,
Գևորգյան Սուրեն-Քարակերտի քարի մշակման գործարանի տնօրեն,
Կանայան Ստեփան-գ.թ., ՄԱԿ-ի փորձագետ,
Կնյազյան Վալերի- գ.դ., Անօրգանական քիմիայի ինստիտուտի տնօրեն,
Լևոն Թորոս-գ. թ., ԱՄՆ, Հայ ճարտարագետների և գիտնականների միություն,
Սանասարյան Հակոբ-գ. թ., բնապահպան,
Միրզոյան Վալերի-գ.դ., կառավարման մասնագետ,
Սարգսյան Վաղինակ-գ.դ., ԳԱԱ,
Ստեփանյան Անատոլի-գ. թ., ԳԱՄ նախկին տնօրեն,
Վարդանյան Կարեն-գ. թ., ՏՏ ոլորտի մասնագետ:
Մասնագետների խորհրդի լիազոր ներկայացուցիչ`Բարսեղյան Գրիգոր-գ.դ., ԳԱԱ
Հասցե` Ներքին Շենգաոիթ, 6 փ., 1 նրբ. տ. 5, հեռախոս`O94 488353, էլեկտրոնային հասցե` [email protected]
Հ.Գ. Հարկ ենք համարում տեղեկացնել, որ «Հայ մասնագետների խորհուրդ»-ը ընդարձակելու է իր կազմը, գործունեության ոլորտները և մասնավորապես` հետամուտ է լինելու իր ներկայացրած առաջարկությունների քննարկմանը, իրագործմանը: Մենք նաև համակարգված մասնագիտական վերլուծություններ, մշտադիտարկում ենք իրականացնելու ՀՀ կառավարության գործունեության, ներկայացրած ծրագրի և նրա կենսագործման ուղղություններով: Կարծում ենք, որ մեր գործունեությամբ կնպաստենք պաշտոնատար անձանց որակական պատրաստվածությանը ներկայացվող մասնագիտական բարձր պահանջների արմատավորմանը, որոշումների ընդունման հիմնավորվածությանը, մասնագիտական գիտելիքիների ներառականությանը և պատասխանատվության հասցեականությանը: «Հայ մասնագետների խորհուրդ»-ը գործելու է ՀՀ օրենսդրության շրջանակներում թույլատրելի, ինչպես նաև չարգելված բոլոր միջոցներով և եղանակներով:
