«Սիբիրում, առևտրի կենտրոնում բռնկված մեծ հրդեհից հետո, որին զոհ գնացին ավելի քան 64 մարդ, այդ թվում շատ երեխաներ, Ռուսաստանում վիշտն ու կատաղությունն են տիրում: Եվ քաղաքական արձագանքն էլ շատ բան է ասում հասարակության մասին»,- գրում է շվեյցարական Neue Zürcher Zeitung- թղթակից Մարկուս Աքերեթը:
Ռուսաստանով մեկ՝ վախը, վիշտն ու վրդովմունքը միախառնվում են ռուսական պետությունը ներկայացնող ինստիտուտների և մարդկանց նկատմամբ անզորության և ցասման հետ:
«Հույզերն էլ ավելի ուժեղ են այն պատճառով, որ այս աղետի լույսի ներքո ավելի տեսանելի է դառնում պետական ապարատի թուլությունը, անգործությունն ու անմարդկայնությունը»,- համոզված է լրագրողը:
«Չնայած որ Կեմերովո ուղևորության ընթացքում Պուտինը նկատելիորեն ցնցված էր, այս այցը միևնույն ժամանակ ցույց տվեց, թե որքան է նա կտրված իրականությունից: Սա քաղաքացիների ստրկամտության, անպատասխանատվության և գործունակության բացակայության վրա հիմնված քաղաքական համակարգն է, որը նա կատարելության հասցրեց վերջին 18 տարիների ընթացքում»,- պնդում է Աքերեթը:
Պուտինը չմասնակցեց Կեմերովոյի կենտրոնական հրապարակի միտինգին, իսկ նրա «մենք խոսում ենք դեմոգրաֆիայի մասին, կոչ ենք անում երեխաներ ունենալ, իսկ արդյունքում նման բաներ, ինչքան երեխա կորցրեցինք» արտահայտությունը, մեղմ ասած՝ տեղին չէր, – նկատում է հոդվածի հեղինակը:
Կեմերովոյի միտինգը պարզորոշ ցույց տվեց, թե որքան խարխլված է պետական իշխանության նկատմամբ ժողովրդի անվստահությունը:
