Արևմտյան դիվանագետներն ու էմիսարները, երբ հայտնվում են Հայաստանում, սկսում են իրականությունը չտեսնել: Այդ մասին «Առաջին լրատվական»-ի հետ զրույցում նշեց «Ժողովրդավարական հայրենիք» կուսակցության նախագահ, «Հանուն Հայաստան պետության» ճապատի անդամ Պետրոս Մակեյանը՝ անդրադառնալով ԱՄՆ դեսպան Ռիչարդ Միլսի հարցազրույցին, որտեղ վերջինս անդրադառնալով Ժիրայր Սեֆիլյանին ու «Սասնա ծռերին», նշել էր, որ իրենք չեն աջակցում այնպիսի խմբերի, որոնք փորձում են անօրինական ճանապարհով տապալել ընտրված իշխանություններին, և հատկապես այնպիսի խմբերին, ինչպիսին «Սասնա ծռերն» են, որոնք բռնությունը գերադասում են երկխոսությունից:
«Ես բազմիցս խոսել եմ Արևմուտքի դիվանագիտական գործելաոճի, նրանց պահվածքի, գնահատականների, արժեհամակարգի մասին: Որ արևմտյան արժեհամակարգը գործող ու նորմալ արժեհամակարգ է, փաստ է, բայց որ արևմտյան դիվանագետներն ու էմիսարները հայտնվում են Հայաստանում ու իրականությունը չտեսնել, դա էլ փաստ է: Հայաստանում ընտրված իշխանություն 20 տարի գոյություն չունի: Հայաստանում իշխանությունը բռնազավթվել է 2003 թվականից սկսած: Նույնիսկ Սահմանադրական դատարանը, որ զրո վստահություն ունի, որոշեց, որ 2004 թվականին պետք է վստահության հանրաքվե անցկացնել: Մենք տեսանք, որ Ռոբերտ Քոչարյանը և նրա նազիր-վեզիները անտեսեցին ՍԴ որոշումը և չկատարեցին այն: Արևմուտքը դա չտեսա՞վ: Արևմուտքը չտեսա՞վ, որ 2008-ի մարտի 1-ին դիպուկահարներով մարդկանց վրա կրակում էին: Պրեսկոտն ու Կոլոմբիեն եկան այստեղ վաճառվեցին, գործարքի մեջ մտան իշխանության հետ՝ նույն Դավիթ Հարությունյանի քավորությամբ, ու էլի «չտեսան», որ Հայաստանում ընտրություն չի եղել: 2013 թվականին չե՞ն տեսել, որ Հայաստանում ընտրություն չի եղել: Կամ 2017 թվականին 10 հազար դրամով քվեարկությունն ընտրությո՞ւն է համարում ԱՄՆ դեսպանը»,-հայտարարեց Մակեյանը՝ նկատելով, որ եթե այսպիսի ընտրության 10 տոկոսը լինի ԱՄՆ-ում, այդ երկիրը շուռ կգա, կքանդվի:
Ինչ վերաբերում է Ժիրայր Սեֆիլյանին ու «Սասնա ծռերին», Մակեյանն ասաց. «Երբ ամերիկացի դիվանագետը տեսնում է, որ այդ մարդիկ հանրության համակրանքն են վայելում, իր գնահատականներում պետք է զուսպ լիներ»:
Ամբողջությամբ՝ տեսանյութում։
