Քաղաքագետ Սերգեյ Շաքարյանցը համոզված է, որ Հայաստանում ռուսական հարվածային օդուժ կենտրոնացնելը լուրջ և լայնածավալ պատերազմի նախանշան է, բայց ոչ՝ Ադրբեջանի դեմ: Այս մասին նա հայտարարեց այսօր կայացած մամուլի ասուլիսի ժամանակ՝ հավելելով, որ ոչ ոք չպետք է կասկածի՝ ռուսական նոր ռազմատեխնիկան ուղղված է լինելու դրսի ուժերի դեմ և ոչ Հայաստանի անվտանգությանը: «Սակայն մտավախություն ունեմ, որ Հայաստանին շատ ուշ տեղյակ կպահեն, թե ում դեմ և երբ է սկսվելու պատերազմը»,- նշեց նա:
Քաղաքագետը հիշեցրեց, որ Անդրկովկասում ռուսական զինուժի թիվը 20-25 հազար է, որից 8 հազարը կենտրոնացած է Հարավային Օսիայում, ևս 8 հազարը՝ Աբխազիայում: «Տարածաշրջանում բազմաթիվ չլուծված հարցեր կան, և դրանք լուծելու համար ռուսական բազան անհրաժե՞շտ է մեզ»,- հարց հնչեցրեց Սերգեյ Շաքարյանցը:
Անդրադառնալով «Էրեբունի» օդանավակայանի՝ ռուսական ռազմաբազային հանձնելու հանգամանքին՝ քաղաքագետը նկատեց, որ հարցն ուռճացնել չարժե: «Օդանավակայանի մի մասն արդեն իսկ ռուսական բազայի տնօրինության տակ էր: Իսկ այժմ այն դառնում է համատեղ օգտագործման տարածք: Սա չի նշանակում, որ «Էրեբունի»-ն հանձնվում է ռուսներին: Հայկական օդուժը ևս դրա նկատմամբ իրավունքներ ունի: Որոշ ուժեր, պարզապես, սրանից էժան սպեկուլյացիայի թեմա են սարքում: Մարդիկ, ովքեր իրավունք չունեն քիթը խոթել ռազմական գործերի մեջ, այնուամենայնիվ խոթում են: Ամոթ է, երբ որոշ մարդիկ ազգի առաջ միամիտ հայրենասեր տղերք են ձևանում: Նրանցից մեկը՝ նախկինում լրագրող, այժմ ԱԺ պատգամավոր Նիկոլ Փաշինյանը, բոլորս էլ գիտենք, որ մի ժամանակ աշխատում էր Բաղրամյան 26-ի հետ»,- ասաց Շաքարյանցը:
Հիշեցնենք, որ շրջանառվող լուրերի համաձայն` դեկտեմբերի 2-ին Հայաստան Ժամանող ՌԴ նախագահ Վլադիմիր Պուտինն իր հետ «Սմերչ» հրթիռային համակարգեր է բերելու:
Լուսանկարը՝ Photolure-ի
