Երեկ խորհրդարանում քվեարկվեց ու ընդունվեց Կառավարության կառուցվածքի և գործունեության մասին օրենքը: Օրենքի ընդունմանը դեմ քվեարկեցին «Ելք» և «Ծառուկյան» դաշինք խմբակցությունները: «Ելք»-ի ներկայացուցիչ Էդմոն Մարուքյանը հայտարարեց՝ այս օրենքի ընդունումը ցույց է տալիս, որ մենք գործ ունենք կեղծ խորհրդարանական կառավարման համակարգի հետ, որովհետև այս համակարգի դեպքում գործադիր իշխանությունը ամենևին էլ հաշվետու չէ խորհրդարանի առաջ:
Կառավարության կառուցվածքի և գործունեության մասին օրենքի նախագծով շարունակելու են գործել վարչապետին և կառավարությանը կից բազմաթիվ պետական կառույցներ: «Ելք» խմբակցությունը առաջարկել էր կառավարության կառուցվածքի իր այլընտրանքային մոդելը, ըստ որի, որևէ առընթեր մարմին դուրս չէր մնում կառավարության կառուցվածքից: Սակայն իշխանությունները մերժել էին այդ տարբերակը:
Էդմոն Մարուքյանին առավել անհանգստացնում է ոստիկանության և ազգային անվտանգության ծառայության դուրս մնալը կառավարության կազմից: Դեռևս Ռոբերտ Քոչարյանի նախագահության տարիներին ՆԳՆ-ն ու ԱԱԾ-ն նախարարությունից վերածվեցին կառավարությանը առընթեր մարմինների: Իշխանությունը հոգաց այն մասին, որ ՆԳ և ԱԱ նախարարները չներկայանան խորհրդարան, և պատգամավորները իրենց հարցերով չանհանգստացնեն նրանց: Մի պահ խոսակցություններ կային, որ իշխանությունը որոշել է տեղի տալ արևմտյան կառույցների պահանջներին և ստեղծել ՆԳ նախարարություն, դրանից առանձնացնելով ոստիկանությունը: Բայց այդ խոսակցությունները մնացին անցյալ անկատարի մակարդակում:
Էդմոն Մարուքյանը ասում է, որ ինքը հույս ուներ, որ այդ կառույցները կընդգրկվեին կառավարության կազմում կառավարման խորհրդարանական տարբերակի անցնելու պարագայում, բայց այդ սպասումները չարդարացան: Նա պնդում է, որ եթե այդ կառույցները կառավարության կազմում չեն, ապա խորհրդարանը չի կարող պատշաճ խորհրդարանական վերահսկողություն սահմանել այդ կառույցների կատմամբ: Օրինակ՝ պատգամավորները չեն կարող այդ կառույցների գործունեության ոլորտների հետ կապված խորհրդարանական լսումներ կազմակերպել և ոստիկանապետին կամ ԱԱԾ ղեկավարին հրավիրել այդ լսումներին: Այն պահից, երբ այդ կառույցները դուրս են բերվել կառավարության կազմից, ոստիկանապետն ու ԱԱԾ ղեկավարը ոտք չեն դրել խորհրդարան:
Պետաիրավական հարցերի հանձնաժողովի նախագահ Գևորգ Կոստանյանը փորձում է բացատրել, որ այդ կառույցների քաղաքական պատասխանատուն վարչապետն է, և նա կարող է պատասխանել այդ կառույցների գործունեության հետ կապված ցանկացած հարցի: Սա այնքան էլ հուսադրող բացատրություն չէ, քանի որ քիչ հավանական է, որ նոր ընտրված վարչապետը ընդհանրապես կգա խորհրդարան և կպատասխանի պատգամավորների հարցերին իր փոխարեն, ուր մնաց, որ դա անի նաև ոստիկանապետի և ԱԱԾ ղեկավարի համար:
Ընդհանրապես այն պնդումը, որ այն համակարգը, որը գործելու է ապրիլից Հայաստանում, շատ քիչ կապ է ունենալու կառավարման խորհրդարանական մոդելի հետ, միանգամայն տեղին է: Այնպես, ինչպես մինչև այժմ գործող կառավարման համակարգը կիսանախագահական չէր: Հայաստանում գործում է անձնիշխանություն, և չկան որևէ մոդելներ: Սահմանադրությունը, օրենքները, խորհրդարանն ու պետական իշխանության մյուս մարմինները ֆիկցիա են, սովորական դեկորացիաներ: Իհարկե բոլորը գիտեն դրա մասին, և բարեխղճորեն կատարում են իրենց վերապահված դերը:
