«Երկիր Ծիրանի» կուսակցությունն առաջիկա օրերին իրազեկման հաջորդ երթը նախաձեռնում է իրականացնել Սյունիքում։
«Իրազեկման երթեր պետք է անցկացնենք ՀՀ բոլոր մարզերում․ Գյումրիից ու Վանաձորից հետո որոշել ենք գնալ Սյունիք և շատ ենք կարևորում, որ համահայկական ընդվզումը լինի թե Երևանում, թե հյուսիսում, թե հարավում․ հարավը իր մեջ պետք է ներգրավի Կապանը, Սիսիանը և մտածում ենք, որ հրդեհի օջախները պետք է այսպես տարածենք»,- «Առաջին լրատվական»-ի հետ զրույցում ասաց «Երկիր Ծիրանի»-ի նախագահ Զարուհի Փոստանջյանը։
Վերջինիս խոքերով՝ սա մի գործընթաց է, որն իր մեջ պարունակում է շարունակական գործողություններ․
«Սյունիք այցելելուց հետո կորոշենք, թե հաջորդ շարունակական գործողությունը որը պետք է լինի»,-նշեց նա։
Մարտի 10-ին Ազատության հրապարակում «Հանուն Հայաստան պետության» ճակատի անդամները նախատեսում են համահայկական հանրահավաք անցկացնել։ Ճակատի անդամ Թամարա Հովհաննիսյանն ավելի վաղ «Առաջին լրատվական»-ի հետ զրույցում հայտարարել էր, որ բանակցություններ կվարեն թե Զարուհի Փոստանջյանի, թե նաև Նիկոլ Փաշինյանի հետ՝ հանրահավաքին միանալու համար։
«Անձամբ ես և ճակատը կարծում ենք, որ գոլ խփելու համար թիմ է պետք։ Չեմ ասում իրար տուն գնանք, սուրճ խմենք, բայց գործի ու նպատակի համար պետք է ձեռք սեղմել»,-մասնավորապես ասել էր Թամարա Հովհանիսյանը։
Զարուհի Փոստանջյանից հետաքրքրվեցինք՝ ճակատի անդամներն իր հետ արդեն հանդիպե՞լ են, առաջարկ եղե՞լ է այդ հանրահավաքի միանալու․
«Ես որևէ մեկին չեմ տեսել, որևէ մեկից մենք առաջարկներ չենք ստացել և պետք է ասեմ, որ պետք է լինեն հստակ ծրագրված գործողություններ, այլ ոչ թե մեկ հանրահավաք․ իհարկե ողջունելի է, որ մարդիկ ցանկանում են հանրահավաքների և բողոքների տեսքով հանդես գալ , բայց որպեսզի մենք կարողանանք գործել, որպեսզի դա լինի իրոք ընդվզում, ապա պետք է ներառի համազգային գաղափարախոսությունը և համազգային ծրագիրը, միասնությունը պետք է տեղի ունենա մեր ազգի հատվածների միջև , ոչ թե քաղաքական գործիչները կամ քաղաքական ուժերը պետք է միանան միմյանց, այլ պետք է միանանք գաղափարախոսության, սկզբունքների և ծրագրի շուրջ»,-պատասխանեց նա։
Մանրամասները՝ տեսանյութում։
