«Դեղատոմսերի կիրառումը միանշանակորեն ճիշտ է։ Ամբողջ աշխարհն է գնացել դրան։ Դեղատոմսերի ներդրումով մի շարք խնդիրներ կլուծվեն, կբարձրանա բուժսպասարկման, բուժծառայությունների որակը։ Բայց ամեն նոր բան ներդնելուց առաջ մենք պետք է խորը վերլուծություն անենք և երբեք չշտապենք, քանի որ շտապելու արդյունքում մենք կարող է սայթաքենք և արժեզրկենք ճիշտ գաղափարը»,-«Առաջին լրատվական»-ի հետ զրույցում ասաց Կանխարգելիչ սրտաբանության կենտրոնի գիտական ղեկավար, բ.գ.դ.., պրոֆեսոր, Երևանի գլխավոր սրտաբան Պարունակ Զելվեյանը։
Նրա խոսքով քանի դեռ առողջապահության նախարարությունը չի ներդրել անհրաժեշտ գործիքակազմ, դեղերը դեղատոմսով բաց թողնելու շատ լավ գաղափարը կարող է շատ արագ էլ արժեզրկվել։
Զելվեյանի խոսքով այս նոր փոփոխությունը միանշանակ նոր բեռ է լինելու բժիշկների համար, և բժիշկները ի վիճակի չեն հավելյալ բեռ վերցնել իրենց ուսերին։ «Դրա համար հավանաբար անհրաժեշտ է բժիշկների քանակն ավելացնել առաջնային օղակներում, վարձատրությունն ավելացնել։ Բժիշկը պետք է հարաբերականորեն անհոգ ապրի, որպեսզի կարողանա իր դրական հույզերով օգնի հիվանդին»,-ասաց քաղաքի գլխավոր սրտաբանը։
Եվ հետո, դեղերը դեղատոմսով դարձնելու փոփոխությունը լրացուցիչ բեռ է լինլու նաև հիվանդների համար, քանի որ հիվանդը պետք է գնա, բուժզննում անցնի, վճարի դրա դիմաց, որպեսզի բժիշկը դեղատոմս գրի։
Զելվեյանի խոսքով անհրաժեշտ գործիքակազմի բացակայության պայմաններում, երբ մարտի 1-ից դեղերը դառնան դեղատոմսով, համընդհանուր դժգոհություն է առաջանալու, բժիշկը դեմոտիվացվելու է, դա պրոեկտվելու է հիվանդների վրա։
Առավել մանրամասն՝ տեսանյութում
