2018թ.-ի հունվարի 1-ից ուժի մեջ մտած Հարկային նոր օրենսգրքով՝ գրանցված աշխատողների համար 150 հազար դրամից ավելի աշխատավարձ ստանալու դեպքում եկամտային հարկի դրույքաչափի բարձրացում է նախատեսվում: Հարկային նոր օրենսգրքով՝ մինչև 150 հազար դրամ գրանցված աշխատավարձի համար եկամտային հարկը կազմում է 23%, 150 հազարից մինչև 2 միլիոն դրամ աշխատավարձի դեպքում եկամտային հարկը 28% է սահմանված, իսկ 2 միլիոն դրամից ավելի աշխատավարձի դեպքում՝ 36%:
Ինֆորմացիոն տեխնոլոգիաների ձեռնարկությունների միության (ԻՏՁՄ) նախագահ Կարեն Վարդանյանի համոզմամբ՝ սրանով տնտեսության մեջ ավելանալու է ստվերը։
Նրա խոսքով՝ կառավարությունը փոխանակ օլիգարխների գործունեությունը հանի ստվերային դաշտից և նրանց ստիպի գալ «սպիտակ դաշտ», հակառակը՝ ստիպում է «սպիտակ դաշտում աշխատող մարդկանց գնալ սև դաշտ, այսինքն՝ ավելացնել ստվերը»։
Հարկային բեռի ավելացմամբ մտահոգ ՏՏ ոլորտի ներկայացուցիչները ստորագրահավաք են նախաձեռնել, որին արդեն 1000-ից ավելի մարդ է միացել: Այս ոլորտի ներկայացուցիչները չեն բացառում նաև, որ առաջիկայում բողոքի զանգվածային ակցիաների դիմեն:
Այս համատեքստում «Առաջին լրատվական»-ի հետ զրույցում Կարեն Վարդանյանը շեշտեց. «Կառավարությունը քաղաքական կառույց է, և նա հասկանում է միայն ուժային ճնշում, և եթե ներքևից եկող այդ ճնշումը չլինի, ապա կառավարությունը ոչինչ չի անի։ Եթե կազմակերպված և ճիշտ ձևով ճնշում լինի, և կառավարությունում էլ հասկանան այդ ճնշումը, ապա համոզված եմ, որ կառավարությունը կսակարկի, որովհետև կրկնում եմ՝ կառավարությունը հասկանում է միայն ճնշման ուժը և ստիպված կգնա միջազգային կառույցներին էլ կասի՝ ժողովուրդ, եթե ուզում եք, որ մենք շարունակենք մնալ իշխանության և մեզ այստեղից չհանեն-շպրտեն դուրս, ապա պետք է մենք ենթարկվենք այստեղի ճնշումներին և գնանք փոփոխությունների, իսկ այդ ժամանակ միջազգային կառույցները կասեն, թե ցույց տվեք տեսնենք, թե այդ գումարները որտեղից եք տալու, ու արդեն այս իշխանությունները ստիպված կլինեն իրենց օլիգարխների հետ համաձայնեցնել ու այդ օլիգարխների գումարներից այդ փողերը փակել»։
Նկատենք նաև, որ Հայաստանում ՏՏ ոլորտը գերակա ճյուղ է հռչակված: Ըստ տրանսպորտի, կապի և տեղեկատվական տեխնոլոգիաների նախարարության՝ այս ճյուղից է գոյանում ՀՆԱ-ի մոտ 5 տոկոսը: Վերջին տարիներին ոլորտում գրանցվել է միջինը 30 տոկոս աճ:
Մանրամասները՝ տեսանյութում։
