Նոյեմբերի 15-ին ոստիկանության պետի առաջին տեղակալ, ոստիկանության գեներալ-մայոր Հունան Պողոսյանն ընդունել է «Փրոջեքթ Հարմոնի» միջազգային հասարակական կազմակերպության հայաստանյան գրասենյակի մասնաճյուղի տնօրեն Մարիամ Մարտիրոսյանին և ծրագրի ղեկավար Ձյունիկ Վանեսյանին։
Հանդիպմանը մասնակցել են ոստիկանության քրեական հետախուզության գլխավոր վարչության պետ, ոստիկանության գեներալ-մայոր Արամ Զաքարյանը և անչափահասների իրավունքների պաշտպանության և ընտանեկան բռնության դեմ պայքարի վարչության պետ Նելլի Դուրյանը։
Հունան Պողոսյանը բարձր է գնահատել «Փրոջեքթ Հարմոնիի» հետ համագործակցությունը՝ ընդգծելով անչափահասների շրջանում նրանց կողմից իրականացվող ծրագրերի արդյունավետությունը։
Նշենք, որ միջազգային այս կազմակերպության և ոստիկանության համագործակցությամբ՝ անչափահասների հանցագործությունների կանխարգելմանն ուղղված տարբեր իրավական ծրագրեր են իրականացվել։ Իր հերթին Մարիամ Մարտիրոսյանը բարձր է գնահատել ոստիկանության աջակցությունն ու պատրաստակամությունը։
Հանդիպման ընթացքում ստորագրվեց համագործակցության համաձայնագիր Հայաստանի Հանրապետության մարզերում հատուկ ձևաչափով վերապատրաստման դասընթացներ կազմակերպելու վերաբերյալ։
Այդ դասընթացների արդյունքում կձևավորվեն փորձնական ծրագրեր, կմշակվի դպրոցականների իրավագիտակցությունը բարձրացնելուն ուղղված, ինտերակտիվ մեթոդներով հագեցած միջոցառումների պլանավորման և իրականացման ուղեցույց՝ ոստիկանների և ուսուցիչների համար։
Կողմերը պայմանավորվել են անցկացնել միջգերատեսչական հանդիպումներ և քննարկումներ՝ համայնքային վերականգնողական կենտրոնների հզորացման և նրանց կողմից անչափահաս իրավախախտների համար մատուցվող ծառայությունների ընդլայնման հարցերով։
