«Ավագանու նիստերի ուղիղ հեռարձակումը ոչ մի կերպ չի ապահովում օրենքի պահանջը, որտեղ հստակ ամրագրված է, որ ավագանու նիստերը հրապարակային է։ Ընդ որում դա ասվում է երկու օրենքում և ամրագրված է Երևանի ավագանու կանոնակարգում։ Ոչ ոք Տարոն Մարգարյանին և Արթուր Գևորգյանին իրավունք չի տվել օրենքի բացառիկ մեկնաբանություն իրականացնել»,- «Առաջին լրատվական»-ի հետ զրույցում ասաց «Ասպարեզ» լրագրողական ակումբի նախագահ, Գյումրու ավագանու անդամ Լևոն Բարսեղյանը։
Նրա խոսքերով՝ եթե քաղաքապետարանը մնա իր կարծիքին, ապա այդ ապօրինությունը կհասնի դատարան, և դատարանը ստիպված կլինի ստուգաբանել հրապարակային բառը, որը նշանակում է հանրության համար բաց լինել։
Լևոն Բարսեղյանի խոսքերով՝ կոպիտ սխալ է խնդիրները փորձել լուծել խոսքի ազատության սահմանափակման ճանապարհով, կամ օրենքով հստակ սահմանված քաղաքացիների մասնակցության խախտմամբ։ «Իրենց թվում է, թե այդպիսով այլևս խնդիր չեն ունենա, երբ խոսքը սահմանափակեն, դռները փակեն։ Խնդիրները լուծվում են բուն խնդիրների լուծմամբ։ Եթե չլիներ Նուբարաշենի կոյուղու խնդիրը, կարիք չէր լինի ավագանու նիստի ժամանակ այդպիսի ակցիա կազմակերպել»,-ասաց Բարսեղյանը։
Լևոն Բարսեղյանը անդրադարձավ նաև քաղաքապետարանում տեղի ունեցած միջադեպին ավագանու նիստից մեկ օր անց, երբ լրագրողներին դուրս էին հրավիրել քաղաքապետարանի շենքից, որոնց քաղաքապետարանի շենք էր հրավիրել Զարուհի Փոստանջյանը։ «Ով է ասել, որ ավագանու անդամը չի կարող քաղաքացուն, լրագրողին հրավիրել իր նստավայր։ Դա արգելող որևէ կարգ չկա»,- ասաց Բարսեղյանը։
Մեր զրուցակցի խոսքերով՝ կառավարության, ավագանու նիստերը փակելու որոշումները մեծ աղմուկ կառաջացնեն միջազգային կառույցների մոտ, քանի որ այս ամենը բնորոշ է ավտորիտար համակարգերին։ «Ցավոք, մենք չունենք չորրորդ իշխանություն Հայաստանում։ Չորրորդ իշխանությունն այն է, որը կարողանում է պարտադրել իշխանություն փոխել։ Այն երկրներում, որտեղ լրագրողների հրապարակումներից իշխանություն է փոխվում, այդ երկրում կարելի է փաստել, որ կա չորրորդ իշխանություն։ Լրատվամիջոցները վատ աշխատող իշխանությանը միշտ խանգարում են»,- ընդգծեց Բարսեղյանը։
Առավել մանրամասն՝ տեսանյութում։
