Ազգային ժողովում այսօր՝ փետրվարի 23-ին, «Ելք» խմբակցությունը հրավիրվել է խորհրդարանական լսումներ 2008-ի Մարտի 1-2-ի իրադարձությունների վերաբերյալ:
ՀՀ նախկին գլխավոր դատախազ Գևորգ Կոստանյանն իր ելույթում հայտարարեց, որ շնորհակալ է «Ելք»-ին, որ կազմակերպել է նման լսումներ. «Դա անհրաժեշտություն էր։ Բոլոր հարցերի սպառիչ պատասխանը ես ունեմ»։
Անդրադառնալով հարցին, որ արտակարգ դրությունն այդ ժամանակ ընդունվեց առանց օրենքի, նա ասաց՝ դրա անհրաժեշտությունը չի էլ եղել. դրա համար կար Սահմանադրություն, որով ՀՀ նախագահը իրավիճակից բխող գործողություններ կարող էր անել։
«Ինչ վերաբերում է գաղտնի 008 հրամանին, այո, դա գաղտնի էր, և այդ գաղտնիքը հրապարակելու համար մարդիկ ենթարկվեցին պատասխանատվության։ Արդյոք դա ենթադրո՞ւմ էր զորքի ներգրավվածություն մարտի մեկի իրադարձություններին։ Իհարկե՝ ոչ։ Սա վերաբերում էր զորքը զորանոցային վիճակի բերելուն, քանի որ սահմանին ակտիվացում էր գնում»,- հայտարարեց նա:
Մարտի մեկի զոհերի ծնողները տեղից սկսեցին բողոքել։
Գևորգ Կոստանյանն արձագանքեց. «Ժողովուրդ, ասելով չի, այդ ամենը գրված է։ Ժողովուրդ, եթե ինչ-որ բանի հետ համաձայն չեք, դա դեռ չի նշանակում, որ այդպես չէ։ Ես հասկանում եմ ձեր զգացմունքային դրսևորումները…»։
Մանրամասները՝ տեսանյութում:
