Եգիպտոսի նախարարական կաբինետի որոշմամբ՝ արտակարգ դրության ռեժիմն ու պարետային ժամը, որոնք գործում են արդեն երեք ամիս, պաշտոնապես չեղյալ կհայտարարվեն հինգշաբթի: Այս մասին հայտնում է BBC-ն:
Վարչական զարգացման հարցերով նախարար Հանի Մահմուդի խոսքով՝ որոշումն ընդունվել է կառավարության 6-ժամյա նիստի ընթացքում:
Եգիպտոսի դատարանը վճռել էր, որ արտակարգ դրության ռեժիմը պետք էր չեղյալ հայտարարել երեքշաբթի, սակայն նախարարների կաբինետում վճռել էին սպասել որոշման վերաբերյալ դատարանի պաշտոնական ծանուցմանը:
Արտակարգ դրության ռեժիմն ու պարետային ժամը սահմանվել էին օգոստոսի 14-ին, այն բանից հետո, երբ անվտանգության ծառայության աշխատակիցները ցրել էին տապալված իսլամիստ նախագահ Մուհամմադ Մուրսիի կողմնակիցների երկու ճամբարները:
Սկզբում միջոցառումները սահմանվել էին 30-օրյա ժամկետով, սակայն սեպտեմբերի 12-ին իշխանությունները դրանց գործողության ժամկետը երկարացրել էր ևս երկու ամսով: Արտակարգ դրության ռեժիմը եգիպտական իշխանություններին թույլ է տվել խուզարկություններ ու ձերբակալություններ կատարել առանց համապատասխան օրդերի:
