Հայաստանում թմրամիջոցներ օգտագործողների թիվը ամեն տարի 50 տոկոսով ավելանում է:
Այսօր ներկայացվեց Թմրամիջոցների վերաբերյալ 2012-ի ազգային զեկույցը: Ըստ զեկուցող՝ ԱԱՀ թմրամոլության և թմրամիջոցների դիտակայանի բաժնի ղեկավար Սուրեն Նազինյանի՝ ինչպես աշխարհի բոլոր երկրներում, այնպես էլ Հայաստանում թմրամիջոցների օգտագործումը տարեցտարի աճում է, բայց ոչ այն տեմպերով, ինչպես հարևան երկրներում:
Հիսուն տոկոս աճը, ըստ Սուրեն Նազինյանի, պայմանավոված է նրանով, որ մարդիկ նարկոլոգիական բուժօգնության դիմելու հետ կապված վերաբերմունք են փոխել, ավելի վստահ են դիմում բուժում ստանալու նպատակով, բայց դրանից՝ հիմա իրավապահ մարմինները ավելի շատ են բացահայտում դեպքեր:
«Այն, որ թմրամիջոց օգտագործողների թիվն աճել է, միանշանակ է, բայց դրա հետ մեկտեղ՝ նարկոլոգիական բուժման որակն է բարելավվել, ինչպես նաև իրավապահ մարմինների աշխատանքը»,-ասաց նա:
Նախորդ տարվա դեկտեմբերի 31-ից սկսած մինչև այս պահը թմրամիջոցներ օգտագործած, նարկոլոգիական հաստատությունների կողմից հաշվառված անձանց թիվը եղել է 4332 մարդ: Այս տվյալներում ներառում են ինչպես նարկոլոգիական բուժում ստացածները, այնպես էլ իրավապահ մարմինների կողմից փորձաքննության ենթարկվածները:
2010թ. մեր երկրում միջինացված տվյալներով ներերակային թմրամիջոցներ օգտագործած մարդկանց թվաքականը 12.700 է:
Ոստիկանության կողմից 2012-ին իրավախախտումների և հանցագործությունների համար հաշվառված անձանց 89 տոկոսը գործազուրկ են: Ամենախոցելին այս առումով Երևանն է, ապա՝ Գյումրին, Վանաձորը, Արմավիրի մարզն ու Սյունիքը: