Հասկանալու համար, թե ինչ զարգացումներ են սպասվում Սիրիայում, պետք է փորձել դիտարկել, թե ինչ ռազմավարություն ունեն այնտեղ դերակատարում ունեցող երկրները: Լրագրողների հետ զրույցում այս մասին ասել է Արևելագիտության ինստիտուտի տնօրեն, թուրքագետ Ռուբեն Սաֆրաստյանը:
«Սիրիայի օրինական կառավարությունը, Ասադի կառավարությունն ամեն կերպ աշխատում է, որ երկիրը պահպանվի իր ամբողջությամբ: Օրինակ՝ մյուս խաղացողը Թուրքիան էլ, որը կարևոր խաղացող է, մի կողմից ձգտում է՝ Ասադի իշխանությունը փոխել, մյուս կողմից՝ ցանկանում է այնպես անել, որ քրդերը վերանան այս տարածաշրջանից»,- ասաց թուրքագետը:
Անդրադառնալով գերտերությունների ներկայիս քաղաքականությանը՝ Ռուբեն Սաֆրաստյանն ընդգծեց, որ ԱՄՆ-ն նույնպես ձգտում է, որ Ասադի իշխանությունը Սիրիայում չլինի և մյուս կողմից էլ ցանկանում է, որ Իրանի ազդեցությունը կորի:
Նրա խոսքով՝ Սիրիայում նկատվում է ԱՄՆ ռազմավարության փոփոխություն, որով նրանք ձգտում են իր ռազմական ներկայությունը պահպանել եւ նույնիսկ ուժեղացնել:
Թուրքագետի դիտարկմամբ՝ նախորդ տարի Սիրիայի հիմնախնդիրը թևակոխել էր դիվանագիտական փուլ, ընթանում էր պայքար սեղանի շուրջ, սակայն Թուրքիան վերջին օրերին իր ագրեսիայով կրկին փոխեց իրավիճակը:
«Թուրքիայի ագրեսիան պաշտոնապես դատապարտեց Իրանը, նաև՝ Ֆրանսիան դիմեց ՄԱԿ-ի անվտանգության խորհրդին Աֆրինի հարցով արտակարգ նիստ հրավիրելու համար: Թուրքիայի վերջնական նպատակը՝ ամբողջ թուրք-սիրիական սահմանին անվտանգության գոտի ստեղծելն է: Քայլ առ քայլ նրանք գնում են այս նպատակի իրականացման ուղղությամբ: Սա արվում է քրդական ուժերին հարված հասցնելու համար»,- ասաց նա եւ հավելեց, որ Թուրքիան կանգ կառնի միայն այն ժամանակ, երբ արդեն հատի ամերիկացիների և ռուսների համբերությունը:
Նրա խոսքով՝ թուրքական ագրեսիան վտանգում է այն հաղթանակի արդյունքները, որոնք ձեռք էին բերել Իսլամական պետությանը հաղթանակ տանելու հետ:
«Սիրիայում անկայունության փուլ է սկսվում»,- ասաց Ռուբեն Սաֆրաստյանը:
Թուրքագետը նշեց, որ դեռևս Թուրքիայի քայլերը հանդուրժում են խաղացողները. հանդուրժում են և՛ Ռուսաստանը, և՛ Իրանը: «Կարծում եմ՝ պետք է կանգնեցնեին այս թուրքական ագրեսիան, բայց չարեցին: Որքան շուտ իրենց սխալը հասկանան, այնքան լավ»,- եզրափակեց նա:
