Սաակաշվիլիի խոսքերով` Վրաստանը չի կարող իր քաղաքացիներին կորցնել, ուստի նա պատրաստ է քաղաքացիություն տրամադրել բոլոր նրանց, ովքեր դրան արժանի են: Այս մասին գրում է «Վրաստան Օնլայնը»:
Վրաստանի նախագահ Միխեիլ Սաակաշվիլին բոլոր ցանկացողներին առաջարկել է ունենալ երկրորդ` Վրաստանի քաղաքացիություն:
«Մեզ անդադար քննադատում են այն բանի համար, որ այդքան մարդ քաղաքացիություն է ստացել: Հպարտանում եմ, որ վերջին տարիների ընթացքում Վրաստան ավելի շատ մարդ է եկել, քան այստեղից գնացել են: Դրա հետ մեկտեղ տասնյակ հազարավոր վրացիներ վերականգնել են իրենց քաղաքացիությունը: Ներկայիս կառավարությունը հայտարարում է, որ այդ հարցերում բավականին պահպանողական և պրակտիկ կլինեն, հնարավոր է՝ ոչ ոքի էլ չտան քաղաքացիություն: Ուստի, այդ մարդկանց հայտարարում եմ, որ քանի դեռ ժամանակ կա, քանի դեռ գոյություն ունի այս նախագահի վարչակազմը, մենք պատրաստ ենք նրանց քաղաքացիություն տալ»,- հայտարարել է նախագահը:
Նրա խոսքերով` 5-7 հազար մարդը երկրում եղանակ չեն փոխում: Սաակաշվիլին նաև կոչ է արել կասկածով չնայել հայրենակիցներին, այլ առավելագույնս հանդուրժող լինել նրանց նկատմամբ, որպեսզի իրենք իրենց վրացի զգան:
