Քաղաքական մեկնաբան Հակոբ Բադալյանի կարծիքով՝ այն ինչ արտացոլվել է նախագահ Սերժ Սարգսյանի հարցազրույցում, բնորոշ է ներիշխանական ներկայիս իրավիճակին. «Չկա որոշակիություն՝ ոչ միայն այն պատճառով, որ Սերժ Սարգսյանը չի հայտարարում, բայց կա որոշում, այլ ընդհանրապես գործոններն են բազմազան, միջավայրն է անորոշ, վերջնական որևէ որոշման գալու համար»,- «Առաջին լրատվական»-ի հետ զրույցում ասաց Բադալյանը։
Ըստ մեր զրուցակցի՝ ներիշխանական մրցակցություն, անկասկած, կա, և այդ մրցակցությունը նոր չէ։ «Գուցե մրցակցության սուբյեկտները փոխվում են, հիմա Կարեն Կարապետյան-Սերժ Սարգսյան, կամ Սամվել Կարապետյան-Սերժ Սարգսյան ֆորմատով է։ Բայց այդ մրցակցությունն էլ արտահայտվում է շատ նուրբ տողատակային գործընթացներով, այդ սուբյեկտներն իրար դեմ բացահայտ դուրս չեն գալիս»,- ընդգծեց Բադալյանը։
Ինչ վերաբերում է Սարգսյանի հարցազրույցի՝ ՀՀ-ԵՄ համաձայնագրի դիտարկումներին և այն հայտարարությանը, թե 2013-ին Եվրամիությունն է հրաժարվել ստորագրել փաստաթուղթն ու մեզ երկընտրանքի առաջ կանգնեցրել, Հակոբ Բադալյանն ասաց. «Մենք, և առաջին հերթին հասարակությունը՝ արժե, և ավելի արդյունավետ կլինի, եթե դուրս գանք 2013-ի ստվերից և ավելի շատ մտածենք 2017-ի նոյեմբերի 24-ի և զարգացումների մասին։ Գոնե նվազագույն բանի մենք հասել ենք, և Հայաստանը թեկուզ այդ նվազագույնի համար, շատ թանկ է վճարել։ Ես կարծում եմ՝ նույնիսկ Ապրիլյան պատերազմն էլ որոշակի գին էր նոյեմբերի 24-ին ստորագրված այդ համաձայնագրի համար»։
Հարցազրույցն ամբողջությամբ՝ տեսանյութում։
