ԵՏՄ-ին անդամակցությունը խանգարում է Հայաստանի և իր անմիջական հարևանների միջև տնտեսական հարաբերությունների զարգացմանը։ Այս մասին այսօր ԱԺ Արտաքին հարաբերությունների մշտական հանձնաժողովում «Հայաստանի Հանրապետության մասով Եվրասիական Տնտեսական Միության պայմանագրի գործողությունը դադարեցնելու գործընթաց սկսելու վերաբերյալ» հայտարարության նախագծի քննարկման ժամանակ հայտարարեց «Ելք» խմբակցության պատգամավոր Էդմոն Մարուքյանը՝ ավելացնելով, որ Թուրքիայի հետ սահմանն էլ մշտապես փակ չի մնալու, սակայն որպես ԵՏՄ անդամ Հայաստանը ապագայում նոր, ԵՏՄ-ից առանձին համաձայնագրեր չի կարող կնքել։
Նրա փոխանցմամբ, Հայաստանը պետք է ազատ առևտրի համաձայնագիր կնքեր Իրանի հետ նախքան ԵՏՄ մտնելը, սակայն իրանական կողմից բողոքում էին, որ Հայաստանը չհասցրեց կնքել՝ անդամակցելով ԵՏՄ-ին։ «Իսկ այժմ Հայաստանը բանակցում է Իրանի հետ ԵՏՄ կողմից, այսինքն ազատ առեւտրի համաձայնագիրը լինելու է ոչ թե Հայաստանի և Իրանի, այլ ԵՏՄ-ի և Իրանի միջև»,-նշեց նա։
