ՀՀ վարչապետ Կարեն Կարապետյանը կառավարության աշխատակազմին հանձնարարեց այնպես կանոնակարգել աշխատանքները, որպեսզի գործադիրի նիստերի ընթացքում քննարկվող նախագծերի համար լրացուցիչ քննարկման համար 1-2 օր չպահանջվի:
Կառավարության նոյեմբերի 16-ի նիստում ՀՀ արդարադատության նախարար Դավիթ Հարությունյանի և Ֆինանսների փոխնախարար Ատոմ Ջանջուղազյանի ներկայացրած նախագծերի քննարկման ժամանակ որոշ գերատեսչություններ խնդրեցին 1-2 օր՝ լրացուցիչ քննարկման համար, ինչը առաջացրեց ՀՀ վարչապետի դժգոհությունը:
«Իսկ ինչո՞ւ չենք հասցրել մինչև այս քննարկել: Չենք բացառում ու իդեալիստ չենք, որ հնարավոր են շտապ ինչ-որ շտապ լուծումներ, բայց եթե ամիսներով քննարկում ենք, ինչո՞ւ ենք երկու օր էլ ուզում», – ասաց վարչապետը:
Կարեն Կարապետյանը կառավարության աշխատակազմից պահանջեց առավելագույնս կանոնակարգել աշխատանքները, կարգապահությունը: «Պարզ է, մենք այդպիսի իդեալական համակարգ չենք ունենա, միշտ էլ կարող է օրը ինչ-որ բան թելադրել, բայց նվազագույնի պետք է հասցնել հարցերը լրացուցիչ քննարկելու դեպքերը»,- ասաց նա:
