2018 թ-ի համայնքային բյուջեով նախատեսվում է մի շարք անարդյունավետ ծախսեր իրականացնել։ Երևանի ավագանու «Ելք» խմբակցության ղեկավար Դավիթ Խաժակյանը, նախ, մատնանշեց այն, որ չնայած նրան, որ բազմիցս բարձրաձայնել են՝ տարեկան 11 մլն դրամ ՀՀ ավագանիների ասոցիացիային տրամադրվում է ըստ էության ոչնչի դիմաց, սակայն ծախսը 2018 թ-ի բյուջեով պահպանվում է՝ որպես անդամավճար հասարակական կազմակերպությանը։
«Մենք գրությամբ էինք հանդես եկել՝ դիմելով քաղաքապետին, ասելով, որ համայնքը չի կարող անդամակցել՝ ասելով, որ այդ կառույցը փաստացիորեն չի գործում, սակայն տեսնում ենք, որ 2018 թ-ի բյուջեի մեջ ևս այդ ծախսը նախատեսված է»,- շեշտեց նա։
Դավիթ Խաժակյանը ընդգծեց, որ դեռ շարունակում են 2018 թ-ի բյուջեի նախագիծը ուսումնասիրել, բայց մեկ այլ կարևոր հատկացում ևս արդեն իսկ առանձնացրել են։
«Խոսքը Արգիշտի մեկ հասցեում ՝ քաղաքապետարանի շենքում, վթարային վերելակը նորով փոխարինման և հովացման համակարգի մասին է, որի համար տրամադրվում է 79 մլն դրամ։ Սա բնականաբար շատ մեծ գումար է, մենք պետք է ուսումնասիրենք, եթե նույնիսկ այդ վերելակը վթարային է, նորը ձեռք բերելը արդարացված է, թե ոչ։ Բայց այդ 79 մլն դրամին ես ցանկանում եմ հակադրել մի հանգամանք այն մասին, որ մենք ավագանու նիստերի գրանցումն իրականացնում ենք ձեռքով քվեարկությամբ, էլեկտրոնային համակարգ չի գործում, և հասկանալի է, որ դա էլ որոշակի գումար կլինի։ Եվ փոխանակ մենք այդ ներդրումը կատարենք նման համակարգերին, որը աշխատանքային արդյունավետության հետ է կապված, նման ներդրումներ ենք անում, որն արդյունավետ չէ»,- շեշտեց նա։
Դավիթ Խաժակյանը մատնանշեց նաև այլ անարդյունավետ ծախսեր և բացթողումներ 2018 թ-ի բյուջեում։
Մանրամասները՝ տեսանյութում։
