Վերջին մեկ տարվա ընթացքում հարկերի հավաքագրումը մոտ 8 տոկոսով ավելացել է, միաժամանակ ստուգումների քանակը նվազել է 44 տոկոսով. Այսինքն՝ կլասիկ տարբերակը, որ գնում ստուգում ես ու էդտեղ կոռուպցիա կարող է լինել, 44 տոկոսով նվազել է։ Այդ մասին «Առաջին լրատվական»-ի հետ զրույցում նշել է Ռազմավարական նախաձեռնությունների կենտրոնի ղեկավար Ալեքսանդր Խաչատուրյանը։
«Հիմա մենք կարող ենք ասել, որ կոռուպցիայի դեմ պայքարում ենք ու վերջացնենք, բայց դա գործիք է, որը ցույց է տալիս, թե ինչպես ես դու կոռուպցիայի դեմ պայքարն իրականացնում։ Փաստացի, նվազեցնում ես դեմ առ դեմ շփումը, որտեղ կարող է կոռուպցիայի հնարավորություն լինել։ Թվայնացումը, որը մեր նման երկրները նոր են սկսում անել, երկու բանի մասին է՝ ծախսերի օպտիմալացում և կոռուպցիայի գործոնների նվազեցում։ Եթե դուք որևէ փաստաթուղթ, տեղեկանք կարող եք էլեկտրոնային եղանակով ստանալ, այդտեղ կոռուպցիան նվազելու է, անհնար է, որ չնվազի»,- ընդգծեց նա։
Հարցին, թե չի՞ ստացվում այնպես, որ փոքր խնդիրներին է միայն հնարավոր լինում լուծում տալ, իսկ վերևներում խնդիրը մնում է, Խաչատուրյանը պատասխանեց, որ չի ցանկանում այդ համատեքստում որևէ բան ասել, որովհետև Ռազմավարական նախաձեռնությունների կենտրոնին դա այնքան էլ չի առնչվում, բայց կոնկրետ լուծումների տեսանկյունից նույն թվայնացումը, կամ, ասենք, որևէ համաձայնություն մի անգամ ստանալուց հետո, երբ այլևս պետք չէ երկրորդ անգամ դա ստանալ, փոքր, բայց կարևոր գործոններ են, որոնք կոռուպցիան նվազեցնում են. «Եթե ուզում եք, որ ես մեծ օրակարգ ձևակերպեմ, ես չեմ կարող, որովհետև մեր գործը կոնկրետ պրոդուկտ տալն է, որը մեզ կհասցնի այնտեղ, որտեղ մենք ուզում ենք»։
Դիտարկմանը, որ իշխանությունները մեծ ներդրումների խոստումներ են տվել, որոնք կարծես չեն իրականանում, Խաչատուրյանն արձագանքեց. «Ես նայել եմ ներդրողների ակումբի կայքը և տեսել եմ, որ նրանք 3-4 մեծ նախագծեր են նայում, ամեն մեկը 50-100 մլն դոլարանոց։ Ես իմ պրակտիկայից գիտեմ, որ ներդրման որոշում կայացնելն ու անելը մեկ շաբաթում չի լինում։ Իսկ ներդրողների ակումբն այնքան առաջ է գնացել, որ վերլուծել է պրոյեկտները, տեսել են, որ դա իրենց ձեռնտու է, հաշվել են ու ասել են, թե ինչքան ներդրում են անում։ Դա մեծ պրոգրես է։ Ես վստահ եմ, որ էնտեղ առաջընթաց կա, թեև ես ի պաշտոնե չեմ շփվում»։
Հարցազրույցն ամբողջությամբ՝ տեսանյութում:
