«Ցանկում ներգրավված շատ գործիչներ արդեն իսկ հայտնել են իրենց անհանդուրժողականությունը ցուցակի այլ գործիչների հետ կապված։ Մի մասն ասում է՝ մյուս մասը ռուսամետ է ու համագործակցել չեն կարող։ Կարծում եմ՝ ներկայացված ցուցակը որևէ մեկի հետ համաձայնեցված չի եղել։ Մտածել է, որ հակաիշխանական ելույթներ ունեցող մարդկանց կարելի է համախմբել։ Ժիրայի Սեֆիլյանը և մյուսները մեծ խնդիր ունեն ազատության և փոխանակ այդ ազատությունը հայցեն այնպես, ինչպես ընդունված է՝ ընդունելով իրենց նախկինում կատարած սխալները, այլ բան են անում»,- «Առաջին լրատվական»-ի հետ զրույցում նման տեսակետ հայտնեց «Ազգային անվտանգություն» կուսակցության նախագահ Գառնիկ Իսագուլյանը։
Մեր այն հարցին, թե նկատի ունի՝ Սեֆիլյանը ներողությո՞ւն խնդրի Սերժ Սարգսյանից, Իսագուլյանն արձագանքեց. «Հավատացեք, ես ոչ թե նման բան եմ ասում, այլ նա պետք է գիտակցի, թե ինչն է եղել իր արածի մեջ ճիշտը, ինչը սխալը, ինչն է պատճառը, որ հայտնվել է նման իրավիճակում և այդ իրավիճակից դուրս գալու ամենաճիշտ ճանապարհը որն է»։
Ճշտող հարցին, թե կարծում է՝ ամենաճիշտ ճանապարհը ներողություն խնդրե՞լն է, Իսագուլյանը նշեց. «Բնականաբար, հավատացեք՝ միայն մեծերն են, որ կարողանում են ընդունել, որ ինչ-որ տեղ սխալվել են»։
Հարցազրույցն ամբողջությամբ՝ տեսանյութում:
