«Երևան բրենդ» ծրագրիր. մայրաքաղաքի բրենդի կոնցեպտի և վիզուալ հիմքերի շնորհանդես-ասուլիսին Երևանի քաղաքապետի տեղակալ Արամ Սուքիասյանը նշեց, որ վեցամսյա ժամկետը երևանյան բրենդի համար իրականում կարճ ժամկետ է, որովհետև մշակվում է ոչ միայն մեկ տարբերանշան, այլև իր գաղափարական հենքով մի շարք ոլորտների վերաբերող բրենդային համակարգ: Նրա խոսքով՝ առաջիկա ամիսներին արդեն վիզուալացված կտեսնենք վերջնական Երևան բրենդի տարբերակը, ընդ որում՝ ամենատարբեր ոլորտների՝ մշակույթի, մասնավորապես՝ տուրիզմի, սպորտային միջոցառումների, ամենատարբեր փառատոներում օգտագործվելիք երևանյան էսքիզի առումով:
«Շատ ուրախ եմ, որ բազմաթիվ երևանցիներ, հատկապես երիտասարդ սերունդը կամավոր սկզբունքներով մասնակցել և շարունակելու է մասնակցել՝ հրավիրված մի շարք պրոֆեսիոնալների հետ»,- ասաց Արամ Սուքիասյանը՝ ընդգծելով, որ յուրաքանչյուր քաղաք իր դիմագիծն ունի:
«Կարծում եմ՝ Երևանը նույնպես պետք է ունենա իր բրենդային դիմագիծը՝ ազգային հենքով, որը պետք է բավարարի և՛արտերկրի մարդուն, և՛ հայերին՝ միաժամանակ ունենալով ապագային միտված ժամանակակից տարրեր և մի քիչ ջազային մտածողություն»,- ասաց նա:
Աշխատանքային խմբի մասնակից, բրիտանացի փորձագետ Ալեքսանդր Գրանդն էլ նշեց, որ «Երևանը հին քաղաք է, ավելի հին, քան Հռոմը, իսկ ամենակարևորը ոչ թե հնության և պատմության մեջ է, այլ հավերժության»՝ հավելեով, որ Երևանը հայկական կրեատիվ քաղաք է:
