ԱՄՆ նախագահ Բարաք Օբաման հայտարարել է, որ իր մտադրությունը անփոփոխ է՝ նա կպնդի մատչելի բուժօգնության օրինագիծը, որը ոչ պաշտոնապես ստացել է Obamacare անվանումը:
Մերիլենդ նահանգում շինարարական ընկերության աշխատակիցների առջև ելույթ ունենալիս Օբաման ծաղրել է Կոնգրեսում մեծամասնություն կազմող հանրապետականների առաջնորդ Ջոն Բեյներին, որ նա հրաժարվել է քվեարկության դնել 2014-ի ֆիսկալային տարվա բյուջեն:
«Խոսքը միայն մեկ բանի մասին է` հանրապետականները հակված են մատչելի բժշկական օգնությունը չեղյալ հայտարարելու գաղափարին: Դա, ըստ երևույթին, միակ բանն է, որը նրանց միավորում է»,- Reuters-ը մեջբերում է նախագահի խոսքերը:
Օբաման կոնգրեսականներին կոչ է արել անհապաղ քվեարկել բյուջեի նախագծի օգտին, ինչը թույլ կտա վերականգնել պետական հաստատությունների ֆինանսավորումը: Նախագահի խոսքերով, սակայն, Բեյները վախենում է իր սեփական խմբակցության ծայրահեղ պահպանողականներից:
