Երևանի Ավան և Նոր Նորք վարչական շրջանների ընդհանուր իրավասության դատարանից հունիսի 28-ին բերման ենթարկված Դավիթ Եղիազարյանի դեմ քրեական գործ է հարուցվել՝ իշխանության ներկայացուցչի դեմ բռնություն գործադրելու հատկանիշներով:
Դավիթ Եղիազարյանի դեմ հարուցվել է քրեական գործ՝ 316-րդ հոդվածի 1-ին մասով՝ իշխանության ներկայացուցչի նկատմամբ բռնություն գործադրելը:
Բացի այդ, նույն որոշմամաբ քրեական գործ է հարուցվել նաև պաշտոնատար անձի կողմից փաստաբանի լիազորությունների իրականացմանը խոչընդոտելու համար:
Հիշեցնենք, որ Դավիթ Եղիազարյանը «Սասնա ծռեր» խմբի անդամ Գագիկ Եղիազարյանի եղբայրն է: Նա բերման էր ենթարկվել հունիսի 28-ին, երբ դատարանում «Սասնա ծռեր» խմբի 14 անդամների գործով նիստին ամբաստանյալների և ոստիկանների միջև բախում էր տեղի ունեցել: Երբ ոստիկանները նրան քաշքշելով դատարանի շենքից դուրս էին բերել, շենքի մուտքի մոտ գտնվող փաստաբանները (Լուսինե Սահակայն, Արայիկ Պապիկյան, Ինեսա Պետրոսյան, Դավիթ Գյուրջյան, Մուշեղ Շուշանյան), փորձել էին նրան օգնություն ցույց տալ, սակայն ոստիկանները փաստաբաններին սկսել էին քաշքշել և հրել:
