Հայաստանում մատչելի գներով հանգստի կազմակերպումը միանգամայն հնարավոր է։ Զբոսաշրջության ոլորտի պատասխանատուների վստահեցմամբ՝ զբոսաշրջիկներին առաջարկվող հանգստի տարբերակները բազմազան են, գները՝ նույնպես։
«2017թ-ի առաջին եռամսյակի ընթացքում Հայաստան ներգնա զբոսաշրջային այցելությունների թիվը կազմել է շուրջ 299 հազար, ինչը 18․2 %-ով ավելի է նախորդ տարվա նույն ժամանակահատվածի համեմատ, իսկ 2017թ-ի հունվար-մայիս ամիսների ընթացքում ընդհանուր այցելությունները Հայաստան նախորդ տարվա նույն ժամանակահատվածի համեմատ՝ աճել է ավելի քան 30%-ով։
Ներգնա զբոսաշրջությունների թվի աճը հիմնականում պայմանավորված է Ռուսաստանից, Չինաստանից, Արաբական ծոցի երկրներից, Վրաստանից, Իրանից և եվրոպական երկրներից եկած զբոսաշրջիկների քանակով»,- «Առաջին լրատվական»-ի հետ զրույցում նշեց ՀՀ զբոսաշրջության պետական կոմիտեի նախագահի առաջին տեղակալ Մեխակ Ապրեսյանը։
Վերջինս համամիտ չէ տարածված այն կարծիքների հետ, որ Հայաստանում հանգիստը կազմակերպելը բավականին թանկ հաճույք է։
Մինչդեռ նկատենք, որ տարեցտարի ավելի շատ թվով հայեր նախընտրում են իրենց արձակուրդներն անցկացնել Վրաստանում, որտեղ նրանց պնդմամբ՝ առավել մատչելի և որակյալ ծառայություններ են առաջարկվում, քան Հայաստանի որևէ հանգստյան գոտում։
Այս համատեքստում Մեխակ Ապրեսյանը ընդգծեց, որ Վրաստան մեկնում են ոչ թե մատչելի գնի համար կամ որ Հայաստանը չի կարողանում ապահովել մրցունակ ծառայություններ, այլ այն պատճառով, որ շատերը ցանկանում են իրենց համար ծովային հանգիստ ապահովել։ Նրա խոսքերով՝ թեպետ Հայաստանն ունի Սևանա լիճ, սակայն, դա, բնականաբար, լողափնյա հանգիստը նախընտրողների համար բավարար պայման չէ։
«Այդ առումով եղած տարբերակների միջև Վրաստանն ամենամոտն է ու ամենամատչելին, դրա համար էլ ավելի շատ նախընտրում են գնալ Վրաստան։
Իսկ առաջարկվող ծառայությունների մասով կարող եմ ասել, որ նմանատիպ ծառայությունների դեպքում, հայաստանյան գներն ավելի պակաս են, իսկ որակական առումով՝ մի բան էլ ավելին են վրացականից»,-ասաց նա։
Մեխակ Ապրեսյանը խորհուրդ է տալիս համեմատելի մեծություններ համեմատել, այսինքն, ըստ նրա, Երևանը Բաթումի կամ Քոբուլեթիի հետ չի կարելի համեմատել, այլ՝ Թբիլիսիի հետ, Ծաղկաձորը՝ Բակուրիանիի, Գուդաուրիի հետ:
«Ճիշտ համեմատություն անելիս կհամոզվենք՝ Հայաստանում գներն ավելի մրցունակ են»,- նշեց Ապրեսյանը:
Մանրամասները՝ տեսանյութում։
Լուսանկարը՝ armeniasputnik.am-ի
