Այսօր մեկնարկել է «Սասնա ծռեր» զինված խմբի գործով երկրորդ դատավարությունը, որում ներգրավված են 18 ամբաստանյալներ: Նիստի մեկնարկին պաշտպանները միջնորդել են, որպեսզի երկու գործերը միավորվեն մեկ վարույթում: Եթե առաջնորդվենք իրավական մտածողությամբ և դատավարության բնականոն կազմակերպման անհրաժեշտությամբ, միանգամայն տրամաբանական պահանջ է, որովհետև, ըստ էության, գործ ունենք նույն հանցագործության հետ, որի շրջանակներում, իհարկե, պետք է անհատականացվի յուրաքանչյուրի մեղքի բաժինը:
Դատավորը միջնորդությունը մերժել է, սակայն տվյալ պարագայում գործ ունենք իշխանությունների նման վարքագծի քաղաքական շարժառիթի հետ:
Ակնհայտ է, որ իշխանությունները քաղաքական տեսանկյունից շատ ավելի լավ են նախապատրաստվել դատավարությանը, քան «Ծռերը»: Եթե վերջիններս դատական նիստերին հնչեցնում են ոչ ադեկվատ կարգախոսներ, ապա իշխանությունները, դատական գործընթացն արհեստականորեն երկատելով, փորձել են ջլատել «ծռության» շարժման քաղաքական, կազմակերպչական ռեսուրսը: Դա մասամբ նրանց հաջողվել է, որովհետև այսօր նիստերի դահլիճը, մեղմ ասած, լեփ-լեցուն չի եղել:
Սակայն երկու դատավարություն կազմակերպելով՝ իշխանությունները փորձում են լուծել ավելի սկզբունքային, հեռահար խնդիր: Առաջին գործընթացում ներգրավված են «Ծռերի», այսպես կոչված, ղեկավարները, ովքեր պարբերաբար բանտերից հանդես են գալիս հայտարարություններով, ուղերձներով: Երկրորդ խմբում անփորձ կամ նույնիսկ տատանվող «ծռերն» են, որոնցից մի քանիսը չի կարող անգամ հիմնավորել իրենց կատարած քայլի մոտիվը:
Իշխանությունները պատահական չեն «սորտավորել» «ծռերին», ու գրեթե ակնհայտ է, որ նրանք փորձելու են դատավարության որոշակի հանգրվանում հակասություններ առաջացնել նույն զինված խմբի երկու հատվածների միջև: Սա կլինի «ծռության» քաղաքական կրախի հերթական դրսևորումը:
Լուսանկարը՝ Photolure-ի
