Պոլսո Հայոց պատրիարքարանում տեղի է ունեցել եկեղեցական ընդհանուր ժողով, որտեղ ձայների 22 կողմ և 2 դեմ հարաբերակցությամբ որոշում է ընդունվել դադարեցնել Արամ արքեպիսկոպոս Աթեշյանի լիազորությունները որպես պատրիարքական փոխանորդ: Այս քվեարկությունը ցույց տվեց Արամ Աթեշյանի նկատմամբ պատրիարքությունում լիակատար անվստահությունը:
«Այն ժամանակ սպառնալիքներով մարդկանց իր հակակշռի տակ էր վերցրել, բայց հիմա նա այդ զորությունը չունի այլևս»,- «Առաջին լրատվական»-ի հետ զրույցում ասաց Ստամբուլի «Ակոս» շաբաթաթերթի հայկական բաժնի խմբագիր Բագրատ Էստուկյանը:
Հիշեցնենք, որ թեև մեկ ամիս առաջ Պոլսո Հայոց պատրիարքական փոխանորդ Արամ արքեպիսկոպոս Աթեշյանը հրաժարական տվեց՝ կոչ անելով համախմբվել և պատրաստվել պատրիարքի ընտրություններին, սակայն մինչև վերջին պահը հրաժարականի դիմումը գրավոր չէր ներկայացրել և չէր դատարկել նաև իր գրասենյակը: Հիմա արդեն պատրիարքարանն ամբողջությամբ ներկայացնում է տեղապահ ընտրված Գարեգին Բեքչյանը:
Բագրատ Էստուկյանն «Առաջին լրատվական»-ի հետ զրույցում նշեց, որ մամուլի հրապարակումները, թե Արամ Աթեշյանին կարգալույծ են արել, չի համապատասխանում իրականությանը, պարզապես եկեղեցական ընդհանուր ժողովը դադարեցրել է նրա լիազորությունները որպես պատրիարքական փոխանորդ: Ավելին, նա կարծում է, որ Արամ Աթեշյանին կարգալույծ անելը ճիշտ որոշում չէր լինի. «Կարգալույծ անելու կարիք չկա, դա սկանդալ կլինի: Եթե դրամական զանցառություններով մեղադրվի, միայն այդ պարագայում հնարավոր է»:
Նա նշեց, որ ժողովը տեղի է ունեցել առանց Արամ Աթեշյանի, քանի որ վերջինս բացակայում է Թուրքիայից, մեկնել է հանգստի: «Հիմա իր դժվար ժամանակներն են, ինքը բնավ ժողովրդի մեջ համակրանք չունի, ոչ ոք նրան չի սիրում, մեկուսացած է»,- ասաց Բագրատ Էստուկյանը:
Հիմա արդեն պետք է պատրաստվել պատրիարքի ընտրություններին: Ըստ Բ. Էստուկյանի՝ նախ դեռ պետք է ընտրության հանձնախումբ որոշվի, և թեկնածուները առաջադրվեն, ապա կսկսվի ընտրարշավը:
Դեռևս չեն հստակեցվել պատրարքի ընտրություններին մասնակցողների անունները: Մինչ այս պահը հայտնի են երեք թեկնածուների անուններ՝ Գարեգին Բեքչյան, Գուգարաց թեմի առաջնորդ Սեպուհ արք. Չուլջյան և Արամ Աթեշյան:
Դեռ պարզ չէ՝ արդյոք Սահակ եպիսկոպոս Մաշալյանը կառաջադրվի՞, թե՞ ոչ: Բագրատ Էստուկյանը նշեց, որ ավելի վաղ Սահակ սրբազանը հայտարարել էր, որ իր թեկնածությունը չի առաջադրի:
Բագրատ Էստուկյանը հույս հայտնեց, որ այս տարի Պոլսո նոր պատրիարք կընտրեն, ամենայն հավանականությամբ՝ հոկտեմբեր ամսին:
