Կասկադի հարթակից մայիսի 28-ին իրեն ցած նետած 16-ամյա աղջկա ինքնասպանության փաստի վերաբերյալ ոստիկանության Կոտայքի բաժնում, ի թիվս այլ վարկածների, քննարկվում է նաև վարկած, ըստ որի նրա եղբայրը իր վրա ղումար է խաղացել: ֆոտոլրագրող Գագիկ Շամշյանի տեղեկացմամբ, մայիսի 29-ի կեսգիշերին ոստիկանության Կոտայքի բաժնի քրեական հետախուզության բաժանմունքի աշխատակիցները օպերատիվ տեղեկություններ են ստանում, որ մեկ-երկու օր առաջ Աբովյան քաղաքի թիվ 7-րդ դպրոցի մոտ վիճաբանություն է տեղի ունեցել Սևանի փողոցի բնակիչ 18-ամյա Վիգեն Գասպարյանի հետ, ով ինքնասպան եղած 16-ամյա Տաթևիկ Սերոբյանի եղբայրն է (նույն մորից են, տարբեր հայրերից):
Ոստիկանության Կոտայքի բաժնին բերման ենթարկված Վիգեն Գասպարյանը պատմում է, որ ինքը Աբովյանում իրենց շենքի հարևանությամբ գործող բիլիարդանոցում 100 հազար դրամ խաղագումար է տարվում Արդարադատության նախարարության «Աբովյան» ՔԿՀ պետ Մարատ Գրիգորյանի եղբոր՝ Աշոտի որդուն՝ ԵՊՀ իրավաբանական ֆակուլտետի ուսանող Մամիկոն Գրիգորյանին՝ Մամոյին: Վիգենի խաղագումար պարտվելու մասին իմանում են նրա բարեկամները: Հարազատներից Նվերը Բելգիայից զանգահարում է գաղութի պետի եղբորը՝ Աշոտին և կարողանում է 100 հազար պարտքը դարձնել 50 հազար: Ի դեպ, Աշոտ Գրիգորյանն իր պատիժն է կրում կալանավայրում: Նա դատապարտվել է անցյալ տարի, երբ Վազգեն Սարգսյանի անվան ռազմական ինստիտուտի դիմաց ոստիկանները զինաթափել ու վնասազերծել էին մեծ թվով անձանց, այդ թվում՝ Աշոտին:
Այդ 50 հազարը Վիգենին ուղարկում է Թալինում ապրող թոշակառու տատը, սակայն գումարը ստանալուց հետո Վիգենը ոչ թե վերադարձնում է պարտքը, այլ վերադառնում է Աբովյան և Կինոյի շենքում գործող «Տոտո» բուքմեյքերական գրասենյակում խաղադրույք կատարում ու պարտվում նաև այդ գումարը:
Նա իր այդ քայլը ոստիկաններին բացատրել է նրանով, որ ցանկանում էր կրկնապատել 50 հազարը, որպեսզի կարողանար վերադարձնել նաև տատի պարտքը:
«Տոտո»-ից դուրս գալուց հետո, ըստ Վիգենի, իրեն զանգահարել են և ասել, որ «խոսալու բան կա»: Նրան կանչել են Աբովյանի 7-րդ դպրոցի մոտ գտնվող «լճի սադ» և երեք հոգով քաշքշել ու անգամ գրասենյակային դանակ-սրիչով վնասվածք պատճառել իրեն, որից հետո դիմել են փախուստի սպիտակ գույնի «Նիվա» մակնիշի ավտոմեքենայով: Այս փաստի առթիվ ոստիկանության Աբովյանի բաժին են հրավիրվել Մարատ Գրիգորյանը, նրա որդին՝ Մաքսիմ Գրիգորյանը՝ Մաքս մականունով և Աշոտի որդին՝ Մամիկոն Գրիգորյանը՝ Մամոն:
Կա վարկած, որ Վիգենի 16-ամյա քրոջ ինքնասպանությունը կապ ունի Վիգեն Գասպարյանի պարտքային խնդիրների հետ:
Մայիսի 29-ին ֆոտոլրագրողի հետ զրույցում աբովյանցիները նշել են, որ ոստիկանությունը պետք է օբյեկտիվ քննություն կատարի պարզելու համար, արդյո՞ք 16-ամյա Տաթևիկը ինքնասպանության է դիմել այն պատճառով, որ ինչ-որ անձինք եղբոր ղումարը փակվելու դիմաց պահանջել են իրեն: Աբովյանցիները չեն բացառում, որ հնարավոր է, որ Տաթևիկի նկատմամբ սեռական ոտնձգություններ էլ կատարած լինեն, սակայն վերջնական եզրակացությունը կտա դատաբժշկական փորձաքննությունը:
Ավերի վաղ ոստիկանությունից հայտնել էին, որ մայիսի 28-ի երեկոյան ժամը 22:30-ին Կասկադի վերևի հատվածից, Երևանի խորհրդանիշի հարևանությամբ գտնվող Խորհրդային Հայաստանի 40-ամյակի համալիրի դիտահարթակից, ցած է նետվել 16-ամյա Տաթևիկ Սերոբյանը և տեղում մահացել: Պարզվել է, որ ինքնասպան աղջիկը վերջերս է վերադարձել Ռուսաստանից՝ անձնագիր ստանալու համար:
Ինքնասպանություն գործելուց առաջ աղջիկը հարթակի երկու կողմերում է թողել բջջային հեռախոսն ու դրամապանակը, որի մեջ եղել է 6 հազար ՌԴ ռուբլի:
Լուսանկարները` Գագիկ Շամշյանի
