ԱՄՆ իշխանություններն Աֆղանստանին են վերադարձրել միջինասիական երկրի տարածքից հափշտակված գինու հնագույն կճուճը, ինչպես նաև մի շարք այլ հնություններ: Այս մասին հայտնում է TheDrinkBusiness-ը:
Արժեքավոր իրերի վերադարձման արարողությունը տեղի է ունեցել Վաշինգտոնում Աֆղանստանի դեսպանատանը: Խոսքը մասնավորապես մ.թ.ա. 8-5-րդ դարերով թվագրվող գինու կճուճի և 5 ոսկե զարդերի մասին է:
Այդ իրերը հափշտակվել էին Աֆղանստանից, որից հետո առգրավվել ամերիկյան մաքսային ծառայողների կողմից Նյուարք քաղաքի օդանավակայանում 2011-ի մարտին:
Քննիչները պարզել են, որ իրերը գողացվել էին պատվերով և նախատեսված էին Նյու Յորքի մաքսանենգների համար, որոնք զբաղվում են հնագույն իրերի վերավաճառքով: Դեռևս պարզված չէ գողերի ինքնությունը:
Աֆղանստանի դեսպան Էկլիլ Հակիմին վերադարձված իրերը ազգային արժեք է համարել: