Իրանի նախագահ Մահմուդ Ահմադինեժադը հունիսի 6-ին աշխատանքային այցով գտնվելու է Հայաստանում: Ահմադինեժադի վերջին այցելությունը եղել է 2007 թ.՝ Ռոբերտ Քոչարյանի նախագահության տարիներին:
«Ղարաբաղ» կոմիտեի անդամ Աշոտ Մանուչարյանը «Առաջին լրատվական»-ի հետ զրույցում շեշտեց, որ Ահմադինեժադի այցը կապված է Հայաստանում արտաքին ուժերի ազդեցության մեծացման հետ:
«Հայաստանի վիճակն այսօր այնպիսին է, որ արտաքին կախվածությունը հսկայական է, մենք ունենք արտաքինի ներխուժում մեր ներքաղաքական այս կամ այն ոլորտ: Հայաստանը մի բաց դաշտ է արտաքին ուժերի գործունեության համար, իսկ մեր քաղաքական ուժերից շատ շատերն էլ արտաքին ազդեցությունների սպասավոր են: Այս իրավիճակում Ահմադինեժադի այցը հենց այդ տրամաբանության մեջ է»:
Մանուչարյանը նկատեց, որ Իրանն արագ զարգացող և մեծ հեռանկարներ ունեցող երկիր է, ինչպես նաև Հայաստանի բարեկամ հարևանն է. «Իսկ այս տեսանկյունից ոչ բարեկամ գործողությունները Հայաստանի տարածքում Իրանի համար անընդունելի զարգացումներ են և, անկասկած, անհանգստացնում են Ահմադինեժադին»:
Ըստ Մանուչարյանի՝ ցանկացած ուժ, որը Հայաստանում արտաքին տերությունների գործիքի դերակատարում ունի, Իրանի համար վտանգ է ներկայացնում:
