Ռուս-ամերիկյան հարաբերությունների նորմալացման համար պահանջվում է վերացնել մի ողջ շարք սուր գրգռիչները, որոնք ստեղծվել են ԱՄՆ նախկին նախագահ Բարաք Օբամայի վարչակազմի կողմից։ Այս մասին, ինչպես նշվում է ՌԴ ԱԳՆ ֆեյսբուքյան էջում, Նյու Յորքում ԱՄՆ պետքարտուղարի առաջին տեղակալի պաշտոնակատար Թոմաս Շեննոնի հետ խորհրդակցությունների ընթացքում հայտարարել է ՌԴ փոխարտգործնախարար Սերգեյ Ռյաբկովը։
Ռուսական կողմը նշել է, որ Օբամայի վարչակազմը, միջազգային իրավունքը խախտելով, գնացել է ԱՄՆ-ում ՌԴ դիվանագիտական ներկայացուցչությունների օբյեկտների փաստացի օտարման։
Նշվում է, որ կողմերի միջև առարկայական զրույց է կայացել երկկողմ հարաբերություններին վերաբերող հարցերի լայն շրջանակով։ Ամերիկյան կողմի նախաձեռնությամբ քննարկվել է նաև ռազմավարական կայունության խնդիրն ու այդ թեմայով կանոնավոր երկխոսության վերսկսման հնարավորությունը։
