Սահմանադրական դատարանում շարունակվում է Կոնգրես-ՀԺԿ կուսակցությունների դաշինքի դիմումի հիման վրա` ՀՀ կենտրոնական ընտրական հանձնաժողովի 2017 թվականի ապրիլի 9-ի «Հայաստանի Հանրապետության Ազգային ժողովի 2017 թվականի ապրիլի 2-ի ընտրությունների արդյունքներն ամփոփելու մասին» թիվ 163-Ա որոշումը վիճարկելու վերաբերյալ գործի քննությունը:
Կոնգրես-ՀԺԿ դաշինքի դիմումը ներկայացրեց ՀԱԿ խորհրդարանական խմբակցության ղեկավար Լևոն Զուրաբյանը, նա հայտարարեց, որ ապրիլի 2-ի խորհրդարանական ընտրությունները ժողովրդի կամքի զանգվածային խեղաթյուրում էին:
Լևոն Զուրաբյանն անդրադարձավ նաև ԿԸՀ- անդամներին, նշելով, որ նրանք չեն փոխվում, հանցագործություն են պարտակում և այլն:
ՍԴ նախագահ Գագիկ Հարությունյանը միջամտեց և դիտողություն արեց Զուրաբյանին. «ՍԴ-ում մարդկանց հանցագործներ եք անվանում, չի՛ կարելի, կա մարդու անմեղության կանխավարկած»:
«Ճշմարտությունն եմ ներկայացնում»,- արձագանքեց Զուրաբյանը: Գագիկ Հարությունյանն ասաց՝ դա ձեր ճշմարտությունն է: Լևոն Զուրաբյանը խոստացավ գրավոր ապացույցներ ներկայացնել:
ՀԱԿ խմբակցության ղեկավարը հավելեց. «Մենք այն քաղաքական ուժն ենք, որ գտնում ենք, որ անթույլատրելի է զինված ապստամբություն, տեռորիզմ, մի բան, որն արգելում են սահմանադրական և պետական կառույցները: Մենք շարունակում ենք մնալ այդ տեսակետին, բայց եթե այս համակարգային խախտումները,մ աղճատված ընտրակարգը շարունակի իր կյանքը ՀՀ-ում, վստահ եղեք, որ ոչ մեկի հորդորները չեն կարողանա կանգնեցնել ժողովրդին նման ակտերից, եթե նրանք չեն տեսնում ընտրություններով իշխանություն փոխելու որևէ տարբերակ»:
Մանրամասները՝ տեսանյութում:
