Երևանի քաղաքապետարանում կայացած աշխատանքային հերթական խորհրդակցության ժամանակ, որը վարել է քաղաքապետ Տարոն Մարգարյանը, աշխատակազմի շինարարության և բարեկարգման վարչության պետը զեկուցել է, որ վարչական շրջաններում շարունակվում են 2017թ. ծրագրով նախատեսված փողոցների ասֆալտբետոնե ծածկի նորոգման և ճաքալցման աշխատանքները: Այս մասին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից:
Այս ուղղությամբ հանձնարարվել է հետևողական ուշադրություն դարձնել աշխատանքների ինչպես որակի, այնպես էլ սահմանված ժամանակացույցի պահպանման նկատմամբ: Տրվել է նաև հանձնարարական սեղմ ժամկետում ասֆալտապատող ընկերությունների միջոցներով վերացնել նախորդ տարիների աշխատանքներում ի հայտ եկած թերությունները:
«Այս տարվա համար նախատեսված ծրագրի իրականացմանը զուգահեռ հետևեք ու վերահսկեք, որ նախորդ տարիներին ասֆալտապատում իրականացրած ընկերությունները, համաձայն կնքված պայմանագրերի, իրենց միջոցների հաշվին վերացնեն առկա թերությունները: Ակտիվորեն համագործակցեք նաև Ճանապարհային ոստիկանության հետ և աշխատանքները կազմակերպեք փոխհամաձայնեցված, որպեսզի գծանշման աշխատանքները կատարվեն ասֆալտբետոնե ծածկի նորոգման և ճաքալցման աշխատանքների ավարտից հետո, ոչ թե դրանից առաջ», – ընդգծել է քաղաքապետ Տարոն Մարգարյանը:
Քաղաքապետն անդրադարձել է նաև շինհրապարակներից դուրս եկող տրանսպորտային միջոցների խնդրին:
«Վերջին շրջանում կրկին նկատում ենք, որ մեքենաները շինհրապարակից դուրս են գալիս ցեխոտ անիվներով ու ճանապարհների զգալի մասը ողողում են ցեխով: Կրկին խստացրեք հսկողությունն այս ուղղությամբ և Ճանապարհային ոստիկանության հետ համատեղ հետևեք, որ շինարարական կազմակերպությունները պահպանեն սահմանված պահանջի կատարումը՝ մինչ շինհրապարակից դուրս գալը ապահովեն անիվների լվացումը», – ընդգծել է Տարոն Մարգարյանը:
