Ղազախստանում պետական բարեփոխումների արդիականացմանն ուղղված կլոր-սեղան քննարկում անցկացվեց երկու երկրների տարբեր ոլորտների ներկայացուցիչների մասնակցությամբ: ՀՀ-ում Ղազախստանի արտակարգ և լիազոր դեսպան Թիմուր Ուրազաևը այդ գործում կարևորեց նաև հայ գործընկերների մասնակցությունը փորձի փոխանակման առումով: «Մեզ համար կարևոր է իմանալ, թե որքանով են այդ բարեփոխումները հետաքրքրում մեր հայ գործընկերներին: Մեզ համար կարևոր է այդ ճանապարհին չկրկնել մեր կամ հարևան երկրների անցյալի սխալները»,- ասաց դեսպանը՝ կարևորելով քննարկման ընթացքում հնչած բոլոր առաջարկներն ու դիտողությունները:
ԱԺ ՀՀԿ խմբակցության անդամ Հայկ Բաբուխանյանի խոսքով՝ Հայաստանի համար Ղազախստանը ոչ միայն լավ բարեկամ է, այլև լավ գործընկեր: «Ղազախստանը երբեք անտարբեր չի եղել Հայաստանի խնդիրների նկատմամբ: Մենք ականատես ենք եղել այդ երկրում վերջին 25 տարում կատարված հսկայական բարեփոխումներին»,-ասաց Բաբուխանյանը՝ Ղազախստանի իշխանություններին հորդորելով զերծ մնալ այդ ճանապարհին շտապողականությունից, ինչը բազմաթիվ երկրների օրինակով կարող է ունենալ հակառակ ազդեցություն:
2017 թվականի հունվարի 25-ին Ղազախստանի նախագահ Նազարբաևը հանդես է եկել Ղազախստանի ժողովրդին ուղղված ուղերձով` իշխանության մարմինների լիազորությունների վերադասավորման վերաբերյալ:
Ուղերձում հիմնական ուշադրությունը կենտրոնացված էր երկրի քաղաքական կյանքի արդիականացման գործընթացի վրա` կապված հինգ ինստիտուցիոնալ բարեփոխումների գործընթացի հետ:
Նախատեսվող բարեփոխումներն ուղղված կլինեն նախ և առաջ խորհրդարանի լիազորությունների ընդլայնմանը, ինչպես նաև Կառավարության ինքնուրույնությանն ու պարտականություններին: